Albisteak

San Telmo Museoak Dantzaz ele. Jantziak erakusketa aurkeztu du, martxoaren 28tik apirilaren 23ra klaustroan eta elizan ikusgai izango dena. Proposamenak 2018an museoak hasitako ildoari ematen dio jarraipena; izan ere, Aste Santuko oporraldian San Telmok tradizioekin lotutako programazioa eskaintzen du, Atzokoak gaur tituluarekin, aurreko urteetan lihoaren, artzaintzaren eta saskigintzaren ingurukoa. Aurtengo egitarauak Ipar Euskal Herriko dantza tradizionalei eman die protagonismoa, Maritzuli Konpainiaren eskutik datorren erakusketa honekin.

Azken urtebetean, ia 6.000 lan berri igo dira plataformara. Gehienak museoaren argazki-funtsarekin lotutakoak dira; zehazki, Antton Elizegiren eta Koch familiarenarekin.

Datorren astelehenean, martxoak 27, Antzerkiaren Nazioarteko Institutuak 1961. urtean sortu zuen Antzerkiaren Nazioarteko Eguna ospatuko da, eta aurtengo mezua Egipton jaiotako Samiha Ayoub interpreteak idatzi du (euskarazko itzulpena: Iñaki Iñurrieta). Egun horretako ospakizunen barne, XXIII. Donostia Antzerki Sariko gala antolatu da Victoria Eugenia Antzokian. 

Aste Nagusia 2023ren harira (abuztuak 12-19, biak barne), Donostia / San Sebastián Festak-ek VI. Zurriola Street Food antolatuko du Kursaal Kongresu jauregiko Erizainen plazan. Ferian parte hartzeko eskaera egin dezakete kalean elikagaiak egin, saldu eta/edo sustatzen dituzten pertsona fisikoek zein juridikoek, food truck delakoak erabiltzen badituzte horretarako.

Aste Nagusia 2023ren harira (abuztuak 12-19, biak barne), Donostia / San Sebastián Festak-ek deialdi bat luzatzen du bereziki edariak salduko dituzten gehienez 4 food truck jartzeko gunea - Saguesen - eskainiz. Ferian parte hartzeko eskaera egin dezakete kalean elikagaiak egin, saldu eta/edo sustatzen dituzten pertsona fisikoek zein juridikoek, food truck delakoak erabiltzen badituzte horretarako.

Donostia Kulturak helduentzako eta haurrentzako ordainpeko udaberriko arte eszenikoetako programazioa aurkeztu du gaur. Guztira, 47 ikuskizun izango dira Donostia Kulturaren antzoki eta kultur etxeetan emango direnak: 18 kontzertu, 16 helduentzako antzezlan, 3 haur antzezlan eta 10 dantza ikuskizun.

Poesialdia egitarauaren baitan, gaur, martxoak 21, idazle gazteei zuzendutako Donostia Kultura Poesia Lehiaketaren seigarren edizioaren sari banaketa egin da Udal Liburutegi Nagusiko Mandasko Dukearen aretoan. Aurtengo saritua Julen Apella Santamaria (Berriz, 1998) da, Postal bat desertuan obragatik.

dFERIAren edizio honetako nobedadea nazioartekotze-ildoa indartzea izan da, batez ere Europari begira. Horrek fruituak eman ditu, eta nazioarteko profesional akreditatuen kopurua nabarmen handitu da. Gainera, nabarmentzekoak dira dFERIAn izandako maila artistiko altua eta proposamenen aniztasuna, dFERIA estatu mailako erreferente bezala kokatzen dutenak. Azkenik, publikoaren erantzuna eta akreditatuen maila berreskuratu egin dira pandemiaren ondoren.

Jatorri indiarreko idazle britaniar ezaguna izango da 2023ko lehen Literaktum Topaketen protagonista. Jumpa Lahiri bere ibilbide literarioaz eta apirilean argitaratuko duen Cuentos romanos (Lumen, 2023) liburu berriaz arituko da Iban Zaldua idazlearekin.

Poesialdia, Donostiako Poesia Astearen bosgarren edizioa martxoaren 20tik 27ra izango dugu Victoria Eugenia Club, Liburutegi Nagusia eta Ernest Lluch Kultur Etxean. Sei egunetan zehar poesiaren inguruko ikuskizunak eta solasaldiak antolatu ditugu Euskal Herriko (Itziar Ugarte, Harkaitz Cano, Aritz Gorrotxategi eta Pello Otxoteko) zein kanpoko poetekin (Carlos Marzal, Manuel Vilas eta Mircea Cărtărescu). Albistearen azken paragrafoan adierazi dugu nola lortu gonbidapenak.

Elhuyarrek eta Donostia Kulturak antolatutako solasaldi-zikloaren hiru saio gehiago egingo dira:  martxoaren 14an, apirilaren 18an eta maiatzaren 16an. Saioak euskaraz izango dira, 19:00etan, Ernest Lluch Kultur Etxeko areto nagusian.

Zinemaldia apirilaren 21etik 28ra bitartean garatuko da Victoria Eugenia Antzokian –lehiaketaren egoitza nagusian– eta Principal Antzokian, baita hiriko beste agertoki batzuetan ere. Aurten ziklo labur berezi bat izango da Tabakaleran: Zinema eta memoria. Hiru film eskainiko dira, Historia, Politika edo/eta Kontzientzia sortzeko irudiek duten ahalmena balioan jartzen dutenak. Rithy Panh (Everything Will Be OK) eta Mark Cousins (The March on Rome) zinemagileen lan berriak ikusteko aukera, baita Wanibik film sahararra ere.

Urtero bezala, zinemaldia hainbat gai eta istoriotara hurbilduko da, besteak beste: Irango fundamentalismo islamistaren aurkako erresistentzia, Ukrainako gerra, harkien historia –Aljeriako Gerran armada frantsesaren bandoan borrokatu zuten soldadu aljeriarrena–, XX. mendeko migrazioak, Mendebaldeko Sahararen gaurkotasuna eta Errumaniako gazteriaren egoera Ceaușescuren garaian.

Estibaliz Urresola Solagurenek zuzendutako 20.000 especie de abejas (2023) filmak inauguratuko du apirilaren 21ean Victoria Eugenia Antzokian Donostiako Giza Eskubideen 20. Zinemaldia, Udaleko Giza Eskubideen arloak eta Donostia Kulturak antolatua.

Dagoeneko jakinarazi dira Frantziako zinema beltzari eskainitako Nosferatu zikloaren 2023ko bigarren hiruhilekoaren programazioa osatzen duten filmak. Pelikulak Tabakaleran proiektatuko dira apirilaren 5etik ekainaren 28ra.