Poltsiko Antzerkia Jaialdia

Kris eta Krash ile-apaindegia

Nomofobikak konpainiaren obrako aktoreak Amaia Lizarralde eta Asier Olaizola dira eta Olatz Beobideren kanpo begirada du. Kris eta Krash ile-apaindegian daude, elektrizitatearen erabilera mugatuta dute (lehorgailua, plantxak…) ordaindu behar dituzten faktura altuengatik (argiarena, urarena) eta trikimailuak egitera behartuta daude. Hala ere, bezeroek ez diote joateari utzi, ile-apaintzaileen gomendioei esker beraien arazoak hobetzen baitira.

Diskoberri Txanel: euskaldunon jatorria

Euskal Herriko historia kontatuz, umorezko bakarrizketa berri bat egitea izango da Ion Martinez Esnaola Txikiren proiektuaren asmoa. Espazioaren Big Bangetik, lehen kobazuloetako gizakietara; lehen artzainetatik, erromatar garaira; Nafarroako Erresuma,mundu gerrak, gerra zibilak, frankismoa, ETAren hamarkadak… Euskal Herrian eman den azken fenomeno historikora arte: Chill Mafia.

Ivanka

Obra honen aktorea Irati Agirreazkuenaga da, Igor Arzuaga arduratu da musikaz eta Mikel Ayllon, berriz, aritu da gidoilari eta zuzendari lanetan.

Ivanka gurera heldu den ekialdeko etorkin txiro bat da. Bere kontakizunari esker jakingo dugu zergatik alde egin behar izan zuen bere herrialdetik eta zer aurkitu zuen hemen. Gure gizartearen hainbat alderdi ilunen erradiografia deseroso bat egingo digu: krisi ekonomikoa, gentrifikazioa, matxismoa...

Lakoste

Eneritz Artetxe da gidoilari, zuzendari eta aktorea.

Lakoste antzezlana galdera ugariren gainean eraikitzen den proposamen eszenikoa da: Nola uztartu ama bakarra eta sortzaile izatea? Zergatik ez digu inork sekula menopausiaz ganoraz hitz egiten? Nola hezi nerabe bat? Ze jendarte mota ari gatzaizkie nerabeei transmititzen? Mundu distopiko honetan geratzen ote zaigu elkar zaintzarako eta maitasunerako tarterik?

Bete ingoiau

Obra honen sortzaile eta aktoreak Goiz Eder Iturain eta Esti Curiel dira. Elena Irureta da zuzendaria.

Gasolingegi batean lan egiten du bikote protagonistak. Bertatik pertsonaia nazkagarri zein zoragarriak pasatzen dira eta makina bat sekretu gordetzen ditu gasolindegiak. Egunerokoa monotonia bihurtu da Leonorrentzat, gutun sekretu bat jaso duen arte.

Pertsonaien bizitza hankaz gora jarri eta gizarte honetan bizirauteko beste modu batzuk bilatuko ditugu, umore beltzaz eta absurdoaz lagunduta.

Matriuska

Iraia Elias da proiektuaren zuzendaria eta bi aktoretako bat. Bestea Amancay Gaztañaga da.

Etorkizun berri bat eraikitzeko giltza beraien esku dago. Emakume guzti horiek utzitako ondarearen bidez mundua eraldatzera datoz mesias berria eta bere laguntzailea. Bada garaia bere dohainen ardura hartu eta erronka berriari adarretatik heltzekoa. Bada garaia munduari begiak zabaltzekoa. Bada garaia beren barruan zer dagoen ikusi eta ekintzara pasatzekoa.

Esnatu naiz

Obra honetan Andoni Mutiloa da aktore, gidoilari eta zuzendaria.

Pellok Londreseko Happy end Clubean egiten du lan. Dantzatzeaz eta kantatzeaz gain, bere showa izatea lortu du eta gauero jende asko joaten da bera ikustera....

Ikuskizun honek kontatzen digun istorioa xelebrea izan arren, galdera sakona proposatzen digu: gure nortasuna eta gure bizimodua bat al datoz?

Ama-Alu-Lur (Sorgin baten ametsak...)

Proiektu honen ideia eta gidoia Beatriz Larrañagaren eta May Gorostiagaren eskutik datoz. Biak testuan parte hartzen dute, Imanol Arabaolaza eta Ekaitz Goikoetxearekin batera. Era berean, bertsoak, Ekaitz Goikoetxearenak dira. Azkenik, Beatriz Larrañaga eta Itziar Saenz de Ojer izango dira antzezlanean parte hartuko duten bi aktore nagusiak.

Antzezlan honen abiapuntua komunikabideetan agertutako albiste bat da: Oreretako AITZBITARTE IV kobazuloan, duela 14.000 urte inguruko paleolito garaiko irudiak aurkitu dituzte. Guztien artean goi-behe metro bat baino gehiago den alu bat nabarmentzen da... Albiste horren inguruan sekulako trama prestatuko dute.

Zurrunbiloan

Antzezlan honetan aktore lanetan Nerea Gorriti eta Ander Azurmendi ditugu. Bestalde, gidoilari bezala, Iñigo Dierez ariko da.

Proiektu honen sinopsia hauxe da: Gaizka aulki batean aurkitzen da. Ez daki nola iritsi den horretara, ezta zer gertatu zaion ere. Harrapatuta, laguntza eske hasiko da. Halako batean, eskuan gitarra daraman emakume bat agertuko zaio. Baina... Gizakia al da? Gaizkak ez du jakingo amaiera arte. Dakien bakarra gitarra jole hori bere arazoei amaiera ematen laguntzera etorri dela izango da. Horretarako, bere barnean erantzun asko aurkitu beharko ditu.

Zaharrak Berri (Astolasterra)

Bi aktorek, hiru pieza labur satirikoz osatutako antzezlan "klandestinoa" eskeiniko diote publikoari, musika eta dantzarekin batera, tradizioa gaur egungo errealitatearekin nahastuz: aurreiritzi sozialak, berdintasuna lortzeko emakumearen borroka, etab. Zaharrak berri.

Aktoreak: Nerea Gorriti eta Bárbara Rivas. Zuzendaria: Francisco Lidón.

Gudua

Guru bat eta emakume bat taula gainean.

Emakumea Guruaren kontsultan dago, galdetzen, jakinminez. Energia ez dela sortzen, ezta deuzestatzen ere, transformatu baizik, esaldi sonatua gida harturik, Atauts Sortzaileak lan orijinal hau proposatzen digun, Asier Hernandezen gidaritzapean. Dorleta Urretabizkaiaizango da aktorea.

Puer Aeternus

80ko hamarkadan Dan Keley deituriko psikologoa ohartu zen bere paziente askok hainbat sintoma komunean zituztela: heldutasunarekin lotutako ardurak saihestea, edo ezagunago zen bezala, Peter Pan sindromea. Itsusia eta txarra da zahartzea? Merezi du zahartzeak?

Galdera guzti horiei buruzko hausnarketa proposatuko digu Rubik konpainiak Juan José Herrero eta Estitxu Zaldua Domingo aktoreen eskutik. Xabier Lópezek egingo ditu zuzendaritza lanak.

Erbeste

Proiektu honetan Mikel Fernandino idazketa lanetan ibiliko da. Aitor Fernandino eta Getari Etxegarai izango dira antzezlanean parte hartuko duten bi aktore nagusiak. Azkenik, idazketa estilo eta zuzenketa lanak Maialen Lizarralde eskutik izango dira.

Antzezlan honen xedea zera da: familia desegituratu baten joan-etorriak ezagutzera ematea eta matxismoaren gaitzaz hausnartzea. Horretarako Adam eta Evaren Bibliaren zatia berrikusi beharko dute.

Ni ala zu

Antzezlan honetan aktore ezagunak ditugu (Joseba Usabiaga eta Iñaki Santos). Psikiatriko baten musika gela. Musika eta "musikaeroa" dagoen pertsonaren istorioa. Musikaria bere gelan dago, norbait azalduko zain. Musikaz erotu den "bezeroa" sartzen da. Terapia behar du bere arazoa gainditzeko. Ez ditu pilularik behar, baizik eta pentagrama eta notekin duen obsesioa piskanaka murriztea.

Ideia eta gidoia Joseba Usabiagarena da. Josu Lete diseinu grafiko lanetan arituko da eta produkzioa Ttipia Kultura Sustapenaren esku dago.

Sarean kateatuak

Proiektu hau Amaia Lizarralde, Belen Cruz eta Olatz Beobide aktoreen desio artistikoak bultzatu du: elkarrekin sorkuntza batean buru-belarri murgiltzeko nahiak.

Bizpahiru aldiz bildu ondoren, eta bertan hainbat eta hainbat gai aztertu ondoren, haien lanaren motorra izango den leif motive-a agertu zen: mugikorrekin eta sare sozialekin dugun menpekotasuna. Argi zuten, honetaz hitz egin nahi dutela eta horrela egingo dute bi pazientek bere psikologoarekin duten harremanaren bidez.

Sexijentziak askatuz

Antzezlan hau aktore bakar baten (Itziar Saenz de Ojer) inguruan ematen den bakarrizketa da.

Pedro Arnaez-en gidaritzapean, clown formatuak eskaintzen duen inozentzia eta umorea, harreman erotikoek sortzen dituzten hainbat sinismen oker eta exijentziak aztertzeko erabiliko dira. Benetan gutariko bakoitzak gure sexualitatearen jabe izateak duen garrantziaren aldarrikapena, alegia.

Ekopatetikobikoa

Komedia honetan bi aktore izango dira protagonista nagusiak, Anabel Arraizaeta Jabier Rodil. Antzezlanaren gidoia eta zuzendaritza Alex Telloren esku geratuko da.

Sinopsia: Biki eta Viktor pisu-kideak dira eta bion arteko elkarbizitza tirabiran pasatzen dute. Victor etxebizitzaren jabea da eta lanik egiten ez duenez Bikik ordaintzen dion errentarekin eguneroko gastuei ozta aurre egiten die. Alokairua kontratuaren berritzearekin batera hasiko da eztabaida eta saltsa

Markesa Loucost

Proiektu honetan partehartze oso zabala dago, izatez, 8 pertsonai baititu. Aktoreak hauek izango dira: Maite Aizpurua, Xabier Terrones, Aitor Agiriano, Elena Rodriguez, Rodriguez, Jugatx Mirasolain eta Chiuzo Hayz. Aipatzekoa da "Absurdoaren Antzerkia" deritzon korrontearekin bat egiten duen proposamena dela pertsonaien barne gatazkak modu umoretsuan azaleratuz.

Sinopsia: Markesak Farington Lord-aren etorreraren berri izan du bere bizitza handiustearen krisi momentu okerrenean. Sosik gabe, jauregia hutsik eta inora joan ezin dutelako bertan geratu diren giltzari, atezain eta jauregiko koru bitxiaz lagunduta, markesa Lord-aren harrera festa prestatzen hasiko da. Baina nola liteke hori posible dekadentziaren hurrenean dagoen jauregi batean? Nola mantendu Markesak irudia? Bere aginte lekutik, Markesak han eta hemen bilatuko ditu beharrezko pertsona guztiak: erretratugilea, zerbitzariak, badoa emateko pertsonak, dantzariak, gonbidatuak.... Froga askoren ondoren, ia-ia prest dago guztia Lord handiaren etorrerarako, eta guztia, inongo kosturik gabe.

Satisfaktion

Proiektu honetan partehartze zabala dago: besteak beste, Maria Urzelai (aktorea), Alex Gerediaga (zuzendaria), Azegiñe Urigoitia (jantzia eta eszenografia) eta Oier Ituarte (argiztapena).

"Zoriontasuna ez da batek nahi duena egitea, baizik batek egiten duena maitatzea" (Jean Paul Sartre).

Sinopsia: Kriss eskarmentudun aktoresa da, urteak daramatza mota guztietako lokaletan bere obrak antzezten. Orain dela gutxi, haurdun zegoela eta, arrakastara zuzenean eramango zuen proiektu bati ezetza eman behar izan zion, zuzendari ospetsu baten pelikulako protagonista izateari alegia. Gaur bere berragerpenaren eguna da eszenatoki gainean, errepresentatu gabe gelditu zen prostitutaren pertsonaiari bizitza emanez.

Zer Duzu Amy?

Proiektu honetan partehartze zabala dago: besteak beste, Leire Ucha (aktorea), Eguzki Zubia (zuzendaria), Itziar Markiegi (eszenografia), Ugaitz Alegría (koreografia) eta Natxo Gómez (musika).

Sinopsia: Dasyk edozein gauza egingo luke Amy Winehousen ahotsa eta talentua izateko. Haren heriotzaren berri izan duenean, maleta hartu eta badoa Londresera, Edgwareburyko kanposantura. Hilobi parean zera galdetzen dio: Amy, zergatik ez zinen zoriontsu? Sekulako ahotsa zenuen. Hemendik aurrera irrika, frustrazioa eta bizitzaren borrokaren inguruko obra garatuko da, puntu gazi-gozoak eta umorea ere uztartuz.