Poltsiko Antzerkia Jaialdia - Donostia Kultura

Poltsiko Antzerki Jaialdia formatu txiki eta ertaineko antzerki-ikuskizunen erakustaldia da, eta urtero egiten da Donostiako auzoetako taberna eta lokaletan. Maiatzean izan ohi da.

Poltsiko Antzerkia 2026, Eskailerapekoa, Idoia Torregarai eta Mirari Martiarena

Poltsiko Sorkuntza deialdia
Aurreko edizioak

@Poltsiko

Umorea, antzerkia, magia edota bakarrizketak bateratzen ditu, eta zaleei zein gune eszeniko tradizionaletara joateko ohitura handirik ez duten ikusleei antzerkia hurbiltzea du xede. Lehenengo jaialdia 1991n egin zen.

Poltsiko Sorkuntza Saria

Poltsiko Antzerkiaren alorrean euskarazko sorkuntzak bultzatzeko XVII. Sorkuntza Saria deialdian proiektuak aurkezteko epea 2026ko irailaren 13an amaitu da, proiektu irabazleak urriaren 29an ezagutaraziko dira. Bi proiektu aukeratuko dira: irabazleak 2.500 euro jasoko ditu; finalistak, berriz, 2.000 euro. Saritutako lanak hurrengo Poltsiko Antzerki Jaialdian estreinatzeko konpromisoa hartuko dute (4 emanaldi bakoitzak). Gainera, proiektu irabazleak 3.000 euro jasoko ditu (gordinak eta zergak barne) Poltsiko Antzerki Jaialdian egin beharreko lau emanaldien truke. Finalistak 2.500 euro. Era berean, sormen-proiektuak gauzatzeko, kultur etxeek abenduan zehar espazioak utziko dituzte aukeratutako antzezlanak muntatzeko.

Poltsiko Sorkuntza Saria Poltsiko Antzerkiaren alorrean euskarazko sorkuntzak bultzatzeko sortu zuten Donostia Kulturak, Donostiako Udaleko Euskara Zerbitzuak eta Euskal Herriko Antzerkizale Elkarteak 2011n. Kulturaren balio katearen (trebakuntza; sorkuntza; ekoizpena eta hedapena zein ikustaldia) ibilbide guztia jorratzea ere bada deialdiaren helburua. Horretarako, koprodukzioa bultzatuko da. Urte hauetan guztietan 100dik gora lan aurkeztu dituzte euskal sortzaileek.

Poltsiko Sorkuntzako lan irabazleak

Jasotako Sorkuntza proiektuen artean, epaimahaiak lehen saria eman dio Taxi antzezlanari, eta bigarren saria, Euskal musikarekin, kontuz antzezlanari.

Taxi, 2026ko Poltsiko Antzerki Sariko irabazlea

Taxi

Idoia Garzesek idatzi eta Mikel Martinezek antzeztuko duen lanean protagonista taxista bat da. Berritsua eta jenio bizikoa, aldarte batetik bestera istant batean alda daitekeena, zerotik ehunera azeleragailua sakatuta bere autoa bezala. Bere ofizioaren desbenturak eta kalenturak kontatuko ditu, bere egunerokoa azken finean: hiriko trafikoa, turismoa, bezero-faunarekin izandako pasadizoak... Ofizioaren ajeak aletuko ditu, lanbidea asko aldatu dela, egun taxiak gastuak baino ez dituela ematen... Baina lanbideaz kexu bada ere, maite du ofizioa, baduelako taxiaren aulkiari eta bolanteari estuki lotzen duen motiborik: maitabera da oso. Atzerako ispiluan agertutako edozein begi parek enamoratzen dute, erabat zoratu arte. Hainbestetan aipatuko du "taxiston diskrezio erabatekoa", baina gauzak eskapatuko zaizkio.

Botanikak eskaini zuten emanaldia grabatu zuten eta hemen ikus daiteke:

Euskal musikarekin, kontuz

Tessa Andonegik eta Ainhoa Aierbek euskal musikari buruzko hausnarketa proposatzen dute bikarrizketa honetan, hau da, bi pertsonek gauzatutako bakarrizketan. Izan ere, ez da erraza txikitatik entzundako doinu, kantu, melodia, tiritiri, kalian gora, kalian behera, hau dek umoria zalantzan jartzea. Automata moduan errepikatzen dira belaunaldiz belaunaldi, euskal kultur ondare zabala transmititzeko grinaz. Kantu zahar eta berriak geureganatzen dira eta eguneroko bizitzaren parte bilakatzen dira. Baina, eta hori da gakoa, entzuten al dira benetan automatikoki ikasten diren letra horiek? Entzun, beharbada bai, belarrietan arazorik ez badago behintzat. Baina, eta aditzeko ariketa horri ikuspegi feminista gehituta?.

Xehetasun gehiago

Proiektu irabazleak 2.500 euroko saria jasoko du proposatutako antzezlana garatzeko eta ekoizteko, eta finalistak 2.000 eurokoa
Bestalde, irabazleek antzezlanak 35. Poltsiko Antzerki Jaialdian estreinatzeko eta antzezteko konpromisoa hartuko dute. Bakoitzak lau emanaldi egingo ditu, eta horien truke, 3.000 euro jasoko ditu proiektu irabazleak, eta 2.500 euro finalistak.
Donostia Kulturak, Udaleko Euskara Zerbitzuak eta Euskal Herriko Antzerkizale Elkarteak deialdian parte hartu duten guztiei beren esker ona azaldu nahi diete.

Jasotako proiektuen artean, epaimahaiak lehen saria Igogailu batean amaitu zen mundua antzezlanari, eta bigarren saria, Adriene Bergson-Johnson edo Euskal kulturak iraultza behar du! antzezlanari.

Igogailu batean amaitu zen mundua, 2025eko Poltsiko Antzerki Sariko irabazlea

Igogailu batean amaitu zen mundua

Donostiako AmaHiru konpainiak aurkeztutako komedia izan da aurtengo irabazlea. Iñaki Cid antzerkigile eta aktorearen gidaritzapean, Eneritz Sanchez eta Iñigo Elosegi elkartu dira proiektu honen lantaldea osatzeko. Hona hemen sinopsia: Idoia eta Julen igogailu txiki batean topatzen dira bakoitzak bere aldetik lagun batzuen etxean egindako afari baten ostean. Biek zabor poltsak daramatzate. Ez dute elkar ezagutzen baina beraien bizitza betirako lotuta geratuko da. Bat-batean igogailua geratu eta behera jauziko da. Idoia eta Julen, konortea galdu ondoren, igogailuan esnatuko dira ahots batek hitz egiten diela. Igogailuen enpresako larrialdi zerbitzuetako langilea da, eta berak iragarriko die orain dela 2 ordu munduan hutsegite masibo bat egon dela eta mundua, ezagutzen zuten bezala behintzat, amaitu egin dela.

Adriene Bergson-Johnson edo Euskal kulturak iraultza behar du!

Baionako Itzuli konpainiaren eskutik, Maryse Urrutyk eta Martin Antxiak idatzi eta zuzendutako bakarrizketa izan da aurtengo finalista. Maryse Urrutyk antzeztuta, Adriene Bergson-Johnson enpresagintza eta garapen pertsonalaren inguruko aholkuak trufatzen dituen fikziozko pertsonaia da. Adrienen pertsonaia pentsamendu neo-liberalaren metafora bihurtuko da, eta bere enpresaburu ikuspegi eta errealitatearen arteko desoreka izango da ikuskizunaren umore iturria.
Adriene 1980ean sortu zen, Austinen, Texasen. Bere “outsider” jarrerari esker, gure buruaz, gure ohiturez edota egoera batzuen zentzugabekeriaz irri egiteko aukera ematen du.

Xehetasun gehiago

Proiektu irabazleak 2.500 euroko saria jasoko du proposatutako antzezlana garatzeko eta ekoizteko, eta finalistak 2.000 eurokoa
Bestalde, irabazleek antzezlanak 34. Poltsiko Antzerki Jaialdian estreinatzeko eta antzezteko konpromisoa hartuko dute. Bakoitzak lau emanaldi egingo ditu, eta horien truke, 3.000 euro jasoko ditu proiektu irabazleak, eta 2.500 euro finalistak.
Donostia Kulturak, Udaleko Euskara Zerbitzuak eta Euskal Herriko Antzerkizale Elkarteak deialdian parte hartu duten guztiei beren esker ona azaldu nahi diete.

Jasotako proiektuen artean, epaimahaiak lehen saria eman dio Maite Aizpuruaren Promesa berdina egin diegu lagun guztiei antzezlanari. Beste obra finalista Maider Diaz eta Xabin Fernandezen Famiglia da.

Taxi, 2026ko Poltsiko Antzerki Sariko irabazlea

Promesa berdina egin diegu lagun guztiei

Maite AIzpuruaren zuzendaritzapean, hainbat artista elkartu dira proiektu honetan. Hala nola, interpretazioa eta dramaturgia Intza Alkain eta Maite Aizpurua beraren gain daude, eta testua Mejillon Tigre kolektiboarekin landuko dute. Bidelagun izango dira Matxalen de Pedro eta Edurne Azkarate.

Laguntasunaren gaia ardatz duen ikerketa artistikoa da, poesia, performanzea eta umorea nahasten dituena. Antzezlanean, aktoreek elkar topatuko dute, laguntasunaren omenaldi kritiko bat sortzeko.

Horrela azaldu du lantaldeak antzezlan hau: “Lagunak izatera jolasteko geratuta gaude. Euforiaren aparretan aurkituko ditugu betiko promesak, adiskidetasun erromantikoa, taldearen apologia. Zaratak utzitako tarteetan zalantzak, galderak eta galerak. Salbuespenezko komunitate bat osatuko dugu, mozorro festa edo fedezko erritualaren erreplika honetan. Zaurgarriak, hauskorrak, lagun efimeroak izango gara, benetakoak eta fikziozkoak aldi berean”.

Famiglia

Maider Diaz eta Xabin Fernandezen proiektu hau, komedia beltz bat da. Familia arteko harremanak dira protagonista, baina baita belaunaldi arteko diferentziak edo gizarteak ezarritako presioak ere. Herri txiki bateko autobus geltokian Iñaki (40 urteko aita) eta Jone (21 urteko alaba) elkartuko dira, aitona Joxeren urte betzea da eta zahar etxera doaz bisitan. Autobusaren zain daudela, espero ez duten berri bat jasoko dute, eta ondorioz, elkarrizketak ere espero gabeko bideetara eramango ditu aita-alabak.

Xehetasun gehiago

Proiektu irabazleak 2.500 euroko saria jasoko du proposatutako antzezlana garatzeko eta ekoizteko, eta finalistak 2.000 eurokoa
Bestalde, irabazleek antzezlanak 33. Poltsiko Antzerki Jaialdian estreinatzeko eta antzezteko konpromisoa hartuko dute. Bakoitzak lau emanaldi egingo ditu, eta horien truke, 3.000 euro jasoko ditu proiektu irabazleak, eta 2.500 euro finalistak.
Donostia Kulturak, Udaleko Euskara Zerbitzuak eta Euskal Herriko Antzerkizale Elkarteak deialdian parte hartu duten guztiei beren esker ona azaldu nahi diete.

Jasotako proiektuen artean, epaimahaiak lehen saria eman dio Intujai teatro taldearen Ama-Alu-Lur (Sorgin baten ametsak...) antzezlanari.

Bigarren sariak, berriz, Txinparta taldearen Zurrunbiloan lanari egokitu zaio.

Ama-Alu-Lur, 2019ko Poltsiko Antzerki Jaialdiko irabazlea

Ama-Alu-Lur (Sorgin baten ametsak...)

Proiektu honen ideia eta gidoia Beatriz Larrañagaren eta May Gorostiagaren eskutik datoz. Biak testuan parte hartzen dute, Imanol Arabaolaza eta Ekaitz Goikoetxearekin batera. Era berean, bertsoak, Ekaitz Goikoetxearenak dira. Azkenik, Beatriz Larrañaga eta Itziar Saenz de Ojer izango dira antzezlanean parte hartuko duten bi aktore nagusiak.

Antzezlan honen abiapuntua komunikabideetan agertutako albiste bat da: Oreretako AITZBITARTE IV kobazuloan, duela 14.000 urte inguruko paleolito garaiko irudiak aurkitu dituzte. Guztien artean goi-behe metro bat baino gehiago den alu bat nabarmentzen da... Albiste horren inguruan sekulako trama prestatuko dute.

Zurrunbiloan

Antzezlan honetan aktore lanetan Nerea Gorriti eta Ander Azurmendi ditugu. Bestalde, gidoilari bezala, Iñigo Dierez ariko da.

Proiektu honen sinopsia hauxe da: Gaizka aulki batean aurkitzen da. Ez daki nola iritsi den horretara, ezta zer gertatu zaion ere. Harrapatuta, laguntza eske hasiko da. Halako batean, eskuan gitarra daraman emakume bat agertuko zaio. Baina... Gizakia al da? Gaizkak ez du jakingo amaiera arte. Dakien bakarra gitarra jole hori bere arazoei amaiera ematen laguntzera etorri dela izango da. Horretarako, bere barnean erantzun asko aurkitu beharko ditu.

Xehetasun gehiago

Proiektu irabazleak 4.000 euroko diru-laguntza jasoko du proposatutako antzezlana garatzeko eta ekoizteko. Bigarren sariak, berriz, 3.200 euroko diru-laguntza izango du. 2019ko otsailaren 7tik 24ra Donostiako hainbat taberna eta aretotan egingo den Poltsiko Antzerki Jaialdiaren 28. edizioaren barruan ikusteko aukera izango da.
Donostia Kulturak, Udaleko Euskara Zerbitzuak eta Euskal Herriko Antzerkizale Elkarteak deialdian parte hartu duten guztiei beren esker ona azaldu nahi diete.