Hizkuntzak
Adarra Saria
Donostiako Udalak, Donostia Kulturaren bidez, Adarra Saria sortu zuen 2014an euskal musikako artista edo talde baten ibilbidea eta lana aitortzeko.
Sari hori urtero ematen da Victoria Eugenia Antzokian, ekainaren 21ean, Musikaren Europako Egunean. Ekitaldian Donostiako alkateak saria banatzen du eta segidan, musikari edo talde sarituak kontzertua eskaintzen du.
Sariaren irabazlea erabakitzeko, Donostia Kulturak, urtero, Aholkularitza Batzorde bat eratzen du musika kritikariz, tokiko kulturaren ordezkariz eta Donostia Kulturako kideez osatuta.
Adarra Sariaren bidez euskal musikaren garapenean eta bilakaeran eragin garrantzitsua izan duten artisten ibilbide musikala saritu nahi da.
Ildo horretan, ondorengo alor hauetan egindako ekarpena balioetsiko da bereziki:
- Euskal folkloreko pieza tradizionalak berreskuratzea eta eguneratzea.
- Jatorrizko piezak herri-kantutegira gehitzea.
- Beste interprete batzuengan eragina izan duen estiloa sortu izana.
- Beste musika-estilo batzuekiko lankidetza eta eragiteko moduak irekitzea. batzuekiko Beste musika-estilo batzuekiko lankidetza eta eragiteko moduak irekitzea. eta eragiteko moduak irekitzea.
- Artista-belaunaldi berriei laguntzea eta belaunaldien arteko lan-ildoak irekitzea.
- Bere lana Euskal Herritik kanpo zabaltzea. Eta, horren ondorioz, euskal musika jendarteratzea.
Anari, Adarra Saria 2018 (Argazkia: Foku).
Fermin Muguruza, Adarra Saria 2017 (Argazkia: Foku).
2022ko edizioa
Joseba Tapiak eskuratu zuen Adarra Saria 2022 urtean.
Saria ematerako orduan, musikari lasartearraren ibilbide luzea, moldakortasuna, herri-musikaren ondarea kontserbatu eta zabaldu izana, eta hainbat eta hainbat pieza berri konposatu izana, bai eta akordeoiak askotariko musika-ingurune eta giroetan duen gaurkotasuna frogatu izana ere nabarmendu zuen Jose Joaquin Forcada Forki kazetariak, Auria Etxeandia EGOko komunikazio arduradunak eta Esther Fernandino Donostia Kulturako Musika ataleko teknikariak osatutako Aholku Batzordeak.
Informazio gehiago
Saria
Saria Marijose Recalde artista nafarrak (Iruñea, 1964) egindako eskultura bat da. Garaikurrak adar bat du, musikaren jatorria iradoki nahian, adarrak naturarekin eta jatorrizkoarekin duen zerikusia dela medio.
Obra brontzezkoa da, zenbait koloretako patinan bilduta, osagaiak bereizteko eta musikaren dardara, indarra, alaitasuna eta kitzikapena nabarmentzeko.
Sariaren izena
Sariaren izenak haizezko tresna zaharrari egiten dio erreferentzia, giza espezieak musika egiteko erabili zuen lehenengo instrumentuetako bati, alegia; baina, hostoei eusten dien zuhaitz-adarra ere gogorarazten du, berorren sustraiak lurrean hondoratzen baitira, eta lur horretatik jaiotzen dira kulturak, musika-tradizioa musikarien ekarpenei esker transmititzen eta aberasten den bezalaxe.
Sarituak
Joseba Tapiak eskuratu zuen Adarra Saria 2022 urtean. Saria ematerako orduan, musikari lasartearraren ibilbide luzea, moldakortasuna, herri-musikaren ondarea kontserbatu eta zabaldu izana, eta hainbat eta hainbat pieza berri konposatu izana, bai eta akordeoiak askotariko musika-ingurune eta giroetan duen gaurkotasuna frogatu izana ere nabarmendu zuen Jose Joaquin Forcada Forki kazetariak, Auria Etxeandia EGOko komunikazio arduradunak eta Esther Fernandino Donostia Kulturako Musika ataleko teknikariak osatutako Aholku Batzordeak.
Ekainaren 21ean, Musikaren Europako Egunean, jaso zuen Joseba Tapiak Marijose Rekalde eskultoreak egindako sariaren garaikurra, Eneko Goia Donostiako alkatearen eskutik, Victoria Eugenia Antzokian egindako sari-banaketa ekitaldian. Ondoren, musikari talde zabalaz inguraturik eskaini zuen kontzertua: Nerea Erbiti (ahotsa), Olaia Inziarte (ahotsa), Kristina Aranzabe (ahotsa), Iñigo Telletxea (gitar apala), Iker Uriarte (jazbana), Jexux Aranburu (teklatua), Ion Celestino (tronpeta), Amets Aznarez (tronboia), Ibon Irixoa (saxofoi tenorra) eta Mixel Ducau (saxofoi altua).
Joseba Tapia Adarra Sariarekin (Argazkia: Foku).
Joseba Tapiaren emanaldia (Argazkia: Foku).
Bi norabideko ibilbidea: trikitixa eta erromeria, eta kantagintza.
Txikitan ezagutu zituen biak Tapiak bi bideak. Aitaren familiatik trikitixaren mundua eta amarenetik euskal kantagintza berria. Aitaren bi anaia trikitilari ospetsuak ziren eta Joseba aho zabalik egoten zen haiei begira. 7 urterekin Andre Madalen atera zuen soinu txiki batekin. Ostera, amaren anai gazteenak Ez dok Hamahiruren kontzertuetara eramaten zuen eta gitarra klasikoarekin haien kantuak kantatzen hasi zen oso gazterik. Geroago nerabezaroan Beatles eta rock mundua.
Bere ibilbide musikalean eta diskografikoan bi adar hauek ageri dira nabarmen. Alde batetik, Tapia eta Leturiarekin egindako ibilbidea: trikitixaren eta erromeriaren mundua aztoratu zuten. 1987an argitaratu zuten lehen diskoa. Guztira zortzi disko kaleratu zituzten eta Nazioarteko folk jaialdi garrantzitsuetan ibili.
Bestetik, kantagintza. 1998an bakarkako bidea hasi zuen. Koldo Izagirrerekin batera argitaratu zuen bakarkako lehen lana: Apoaren edertasuna. Soinu hutsez lagundurik kantuan ageri da Koldorekin batera. 1999an Quebec-eko kantagintza modernoaren antologia bat argitaratu zuen hango kantu garrantzitsu eta esanguratsuenen bilduma bat. Hamalau kantu independentziarako Koldo Izagirre eta Itxaro Bordak itzulirik eta Pascal Gaigne, Arkaitz Miner eta Ritxi Salaberriaren, gitarra, arrabita eta kontrabaxuarekin. 2001ean Agur Intxorta Maite 1936-37ko Euskal kantutegi antifaxista Koldo Izagirrerekin batera aurkitu eta eskaini zigun Joseba Tapiak. 2006an Arkaitz Miner eta Jexux Aranbururekin Real Politik izeneko diskoa grabatu zuten. Euskal Herriko lehengo eta oraingo poeten testuekin osatutako kantutegia.
2010ean Eta tira eta tunba karlisten eta liberalen arteko gerran sortutako kantutegi euskalduna gai hartu zuen Tapiak eta 2013an kartzelaldia Luis Rezola gazte kapitainak Duesoko kartzelatik idatzitako bertsoekin osatutako Tximela Kapitainaren izarrak diskoan. 2017an Besamotzak talde elektrikoa aurkeztu zigun Joseba Tapiak Iker Uriarte, Iñigo Telletxea eta Dani Narbarterekin; bere bakarkako ibilbideko kantuekin osatutako lehen bilduma. 2019an eratu zuen gaur egungo banda, bederatzi lagunez osatua, metal, koru eta soul estiloko oinarriekin. Bere kantutegiarekin osatutako Tranpaldo izeneko bigarren bildumaren ondoren, 2021an Egon edo ez egon diskoa plazaratu zuen. Koldo Izagirreren testuekin osatutako lan horretan Et Incarnatus orkestrak parte hartu zuen zenbait kantutan.
Joseba Tapia, Adarra Saria 2022 (Argazkia: Gaizka Peñafiel).
Amaia Zubiria artistak jaso zuen Adarra Saria 2021 urtean. Interprete eta musikagile aparta izatea, kantu tradizionalen gaurkotzaile gisa egindako lana eta euskal zinemako soinu-bandetan izandako lankidetza izan zien bera saritzeko irizpideak.
Ekainaren 21ean, Musikaren Europako Egunean, jaso zuen Amaia Zubiriak Marijose Rekalde eskultoreak egindako sariaren garaikurra, Eneko Goia Donostiako alkatearen eskutik, Victoria Eugenia Antzokian egindako sari-banaketa ekitaldian. Ondoren, musikari talde zabalaz inguraturik eskaini zuen kontzertua: Pascal Gaigne, Karlos Gimenez, Angel Unzu, Iñaki Salvador, Aitor Furundarena, Ritxi Salaberria, Gonzalo Tejada, Luis Camino, Manu Gaigne… Halaber, gonbidatu ugari izan ziren emanaldian: Maider Ansa, Jaione Olazabal, Matixa Otero, Francisco Herrero, Ainara Ortega, bere seme Edorta Amurua eta Jon Maia.
Kantu tradizionalen berritzaile eta euskal abestigintzako ahots
EJose Joaquin Forcada Forki kazetariak, Auria Etxeandia EGOko komunikazio arduradunak eta Esther Fernandino Donostia Kulturako musika ataleko teknikariak osatutako Aholku Batzordeak Amaia Zubiria saritzea erabaki zuen. Euskal musikari eginiko ekarpena, kantu tradizionalak eguneratu izana eta bere interprete eta musikagile ibilbidea nabarmendu zituen batzordeak.
Amaia Zubiria 2021en emanaldia (Argazkia: Foku).
Amaia Zubiria Adarra Saria jasotzen (Argazkia: Foku).
Euskal abestigintza berriko emakumezko abeslaririk garrantzitsuena da Amaia Zubiria batzordearen iritziz. Kantatzea etxean eta lagunartean gorde beharreko kontua zelakoan, ezkutuan hasi zen kantuan, 16 urterekin, kantari berrientzat garai hartan zeuden txapelketetan parte hartzen. 70eko hamarkadan Txomin Artola abeslari eta konpositorearekin Haizea taldea osatu eta kantari gisa jardun zuen. Haizeak ezagutarazi zuen Amaia Zubiriaren ahots garden eta sentikorra. Haizearekin zuzeneko hamaika emanaldi eta bi disko grabatu ondoren, Frantziara eta ondoren Iparraldera jo zuen, eta hainbat jazz musikarirekin hasi zen lanean. Horrela ezagutu zuen Pascal Gaigne gitarrista eta musikagilea. Harekin lanean hasi zen 1983ko udan, eta bikote artistikoa osatu zuten hainbat urtez.
Zubiriak bakarkako lanak eta hainbat musikariekin osatutako egitasmoak tartekatu ditu; hala nola, Imanol, Niko Etxart eta Beñat Axiari. Herri musikaren esparruan eta filmetako soinu bandetan egin du lan nagusiki. Azken urteotan bakarkako ibilbideari heldu dio artistak, kantu tradizionalak eta jazz musika uztartuz.
Amaia Zubiria Adarra Saria 2021en emanaldian (Argazkia: Foku).
Kepa Junkerak eskuratu zuen 2020ko Adarra Saria, euskal musikari egindako ekarpenagatik, kultur tradizioan oinarritu izanagatik, nazioartean izandako zabalkundeagatik eta bere birtuosismoagatik.
Artistaren osasun arrazoiak direla medio, aurreko edizioetan ez bezala, ez zen sari banaketa ekitaldirik eta kontzerturik izan ekainaren 21ean, Musikaren Europako Egunean.
Tradizioarekiko atxikimendua, zabalkundea eta berritzea
Juan González Andrés kazetariak, Irene Larraza Etxepare Institutuko zuzendariak eta Jaione Askasibar Donostia Kulturako Komunikazio eta Irudi zuzendariak osatutako Aholku Batzordeak Kepa Junkera saritzea erabaki zuten, besteak beste, euskal musikari egindako ekarpenagatik, tradizioarekiko atxikimendu eta begiruneagatik, nazioartean izandako proiekzioarengatik, euskal musika tradizionalaren zabalkundeagatik eta artistaren birtuosismoagatik.
Kepa Junkera, Adarra Saria 2020.
Kepa Junkera trikitixa jotzen baserri giroan.
Kepa Junkera konpositore, produktore eta musikariak musika tradizionalean hasi zuen bere ibilbidea eta ondoren, nazioartean euskal musikari ezagunenetako bat izatera iritsi da. Antzinako kantu tradizionaletatik abiatuta, berrikuntzak txertatu ditu, mundu osoko doinu zein erritmo desberdinen eraginak barneratuz eta bide berriak urratuz. La Bottine Souriante, María de Mar Bonet, Carlos Núñez eta Dulce Pontes bezalako musikariekin kolaboratzeaz gain, kantu ugari konposatu du hainbat erakundetarako eta munduan zehar eskaini ditu emanaldiak. Bere ibilbidearen emaitza modura, sari asko jaso ditu, bat aipatzearren, Grammy Latinoa Folk Album Onenari.
Gorka Urbizuk (ahotsa eta gitarrak), David Gonzalezek (baxua) eta Galder Izagirrek (bateria) osatutako Berri Txarrak musika taldeak erdietsi zuen 2019ko Adarra Saria. Saritduna hautatzeko osatutako Aholku Batzordeak taldearen ibilbide artistiko eta profesionala eta publikoarengan izandako eragina azpimarratu zituen sariaren irabazlea jakinarazteko orduan.
Talde nafarrak Donostiako alkate Eneko Goiaren eskutik jaso zuen sariaren garaikurra, Marijose Recalde artistak egindako brontzezko eskultura, 2019ko ekainaren 21ean, Musikaren Europako Egunean, eguerdian Donostiako Udaletxean egin zen sari-banaketa ekitaldian.
Ibilibide artistiko aparta, publiko arrakasta eta euskal kulturarekiko ardura
Juan González Andrés kazetariak, Irene Larraza Etxepare Institutuko zuzendariak eta Jaione Askasibar Donostia Kulturako Komunikazio eta Irudi zuzendariak osatutako Aholku Batzordeak Berri Txarrak taldea saritzea erabaki zuen, besteak beste, musika taldearen ibilbide artistiko eta profesional apartagatik, Euskal Herriko zein nazioarteko publikoarengan izandako eraginagatik, erakutsitako dedikazioagatik eta euskal kulturarekiko izandako ardura eta errespetuagatik.
Berri Txarrak 2019ko emanaldia (Argazkia: Foku).
David Gonzalez, Berri Txarrak taldeko baxu-jolea (Argazkia: Foku).
Berri Txarrak rock hirukoa Nafarroako Lekunberrin sortu zen 1994an. Ordutik bederatzi disko, bilduma-lan bat eta dokumental bat argitaratu ditu, denetan jarrera eta garapen geldiezina erakutsiaz. Euskal Herritik kanpo ere son handiko taldea dugu; bost kontinentetan zehar milaka kontzertutik gora emanakoak dira. Ekoizle, musika jaialdi eta talde esanguratsuekin kolaboratu eta lan egin dute, hala nola: Rise Against, Deftones edo Sick of It All taldeak, Steve Albini, Ross Robinson, Bill Stevenson, Jason Livermore edo Ed Rose ekoizleak eta Hellfest, Fuji Rock, Canadian Music Fest, Wilwarin, Resurrection, Sonorama Ribera, Viña Rock, EHZ, Azkena Rock Festival zein Bilbao BBK Live musika jaialdiak, besteak beste. 2018 urtean taldeak etenaldi mugagabea egingo zuela jakinarazi zuen eta ibilbidea amaitzeko Ikusi Arte Tour 2019bira berezia egin zuen.
Epaimahaiak Berri Txarrak taldearen abestietan letrek duten garrantzia eta melodia gogoangarriak egiteko duten abilezia nabarmendu zuen.
Berri Txarrak taldearen emanaldia: Adarra Saria 2019 (Argazkia: Foku).
Anari Alberdi musikari azkoitiarrak eskuratu zuen 2018ko Adarra Saria. Sari hori jaso zuen lehen emakumea izan zen.
2018 urteko ekainaren 21ean, Musikaren Europako Egunean, jaso zuen Anari Alberdik Adarra Saria, Marijose Recalde artistak egindako brontzezko eskultura, Eneko Goiaren Donostiako alkatearen eskutik. Kantari eta konpositore azkoitiarrak kontzertu berezia prestatu zuen egun horretarako, non 20 urteko ibilbide osoari eman zion begirada, gonbidatu artista askok lagunduta.
Euskal musikari egindako ekarpena
Anarik euskal musikari egindako ekarpenaren garrantzia goraipatu zuten epaimahaiko hiru kideek: Edurne Ormazabal, Tabakalerako zuzendaria; Amaia Ispizua, musika sustatzailea eta Esther Fernandino, Donostia Kulturako musika teknikaria
Euskal musikaren panoramako ahots pertsonaletakoa da Anarirena. Hogei urteko ibilbidean musikari anitzekin kolaboratu badu ere, ondoan izan ditu hasieratik, besteak beste, Mikel Txopeitia, Xabier Olazabal edo Karlos Osinaga. Bere ahots hautsi eta leunarekin batera, Anari den soinu pertsonala sortu du eta hori garbi islatzen da kaleratu dituen disko guztietan. Epaimahaiaren iritziz, artistaren hitzen balio poetiko eta literarioari erreparatuz, euskal literaturaren panoraman ere leku esanguratsuan kokatzen da.
Adarra saria eskuetan duela, 2018an (Argazkia: Foku).
Anari, Adarra Saria 2018 (Foto: Foku).
Formazioa
- Anari Alberdi (ahotsa eta gitarra)
- Mikel Txopeitia (bateria)
- Mariano Hurtado (teklak)
- Xabier Olazabal (baxua)
- Ander Mujika (gitarra)
Invitados/as
- Pello Ramirez (biolontxeloa)
- Xabier Strubell (gitarra)
- Jon Oiartzun (zerra)
- Maite Arroitajauregi (biolontxeloa, ahotsa)
- Petti (ahotsa, gitarra)
- Beñardo Goietxe (ahotsa)
- Borja Iglesias (gitarra)
- Ager Insunza (biola)
Adarra Saria 2018 saioaren emanaldia (Argazkia: Foku).
Fermin Muguruza artista iruindarrak jaso zuen 2017ko Adarra Saria. Beste jatorri batzuetako doinuak eta eraginak bereganatzeko gaitasuna eta hori guztia euskal kulturara ekartzea eta euskararen baitara, izan dira bera saritzeko irizpideak.
Victoria Eugenia Antzokian egindako ekitaldian jaso zuen Fermin Muguruzak Adarra Saria (Marijose Recalde artistak egindako brontzezko eskultura) Donostiako alkate Eneko Goiaren eskutik, 2017ko ekainaren 21ean, Musikaren Europako Egunean. Ospakizun honetarako, Muguruzak oso kontzertu berezia prestatu zuen: lehen aldiz, bere errepertorioko kanta ezagunenak Bartzelonako Taller de Músics-eko Micaela Chalmeta Big Bandak lagunduta abestu zituen.
Beste jatorri batzuetako doinuak bereganatzeko gaitasuna, bide berriak urratzea eta komunikaziorako dohaina
Iñaki Zarata kazetariak, Anjel Valdés musika ekoizleak eta Esther Fernandino Donostia Kulturako musika teknikariak osatutako epaimahaiak Fermin Muguruza saritzea erabaki zuten. Arrazoi nagusienetariko bat artista iruindarrak beste jatorri batzuetako doinuak eta eraginak bereganatzeko duen gaitasuna izan zen eta ekarpen horiek nola barneratzen dituen euskal musikara eta euskaraz. Epaimahaiak Muguruzak bide berriak urratzea eta publiko gaztearekin komunikatzeko ukaezina den gaitasuna nabarmendu zuen.
Fermin Muguruza, zalantzarik gabe, nazioarteko musika panoramaren figura eztabaidaezinetako bat da. 80ko hamarkadaren hasieran euskal musika eszenan eragin handienetakoa izan zuen taldea sortu zuen: Kortatu. Hamarkada horren amaieran, Negu Gorriak talde berria sortu zuen eta Europan eta Amerikan kontzertuak ematen hasi zen. Sei disko argitaratu ostean, taldea desegin zen eta bakarkako ibilbideari ekin zion, reggae, funk, jazz eta elektronika estiloetan sakonduz eta kolaborazio ugari eginez. res Zineman eta antzerkian ere, zuzendari eta ekoizle gisa, lan andana egindakoa da (Checkpoint Rock, Zuloak…) eta zinemara eramandako komikiak ere idatzi ditu (Black is Beltza).
Informazio gehiago Fermin Muguruza
Fermin Muguruza Adarra Sariarekin bere eskuetan, 2017. urtea (Argazkia: Foku).
Fermin Muguruza, Adarra Saria 2017 (Argazkia: Foku).
MICAELA CHALMETA BIG BAND – Taller de Musics Barcelona
- Eva Fernández Blanco, Roser Monforte Gascón, Haizea Martiartu García, Ariadna Just Orriols, Paula Carrillo Martín (saxoak)
- Milagros González, Alba Careta Arnaus, Berta García Gala, Neus Aranda Parés (tronpetak)
- Francina Mercadal Cavaller, Eva Garín Jato, Rocío Martínez Moya, Berta Álvarez (tronboiak)
- Lidia García Bascomta (baxua)
- Norman Pena Mulet (gitarra)
- Laia Vallès Marín (pianoa)
- Gloria Maurel i Peraire (bateria)
- David Pastor (zuzendaria)
Fermin Muguruza Adarra sariaren 2017 emanaldian (Argazkia: Foku).
Benito Lertxundi konpositore oriotarrari eman zion Donostiako Udalak, Donostia Kulturaren bitartez, Adarra Saria 2016 urtean. Udalak bere musika-ibilbide luzean egindako lan aparta, gai herrikoi eta tradizionalak oinarri izatea eta Euskal Herrian eta hemendik kanpora nazioartean erdietsitako sona nabarmendu zituen saridunaren izena iragartzerakoan.
2016ko ekainaren 21ean, Musikaren Europako Egunean jaso zuen Benito Lertxundik Adarra Saridunarentzako propio Marijose Recaldek egindako brontzezko eskultura, Donostiako alkate Eneko Goiaren eskutik, Victoria Eugenia Antzokian izan zen sari-emate ekitaldian. 2016an Oroimenaren Oraina izeneko diskoa ardatz zuen biran murgilduta egon zen Lertxundi eta, horrenbestez, ekitaldian lan horretako abestiak jo zituen, oraindik argia ikusi gabeko hurrengo diskoko hainbat kanturekin eta bere kanturik ezagunenekin batera. Bere ohiko musikariez inguratuta egon zen oholtza gainean: Juantxo Zeberio piano eta sintetizadorean, Amaiur Cajaraville baxuan, David Gorospe baterian, Angel Unzu gitarra eta bouzukiarekin, Gurutz Bikuña gitarrekin, Kutxo Ocho de Eribe arrabitarekin, Pello Ramirez eskusoinuarekin eta biolontxeloarekin, Intza Unanue koroak eginez eta Olatz Zugasti harpa, teklatua eta ahotsa jarriz.
Musika-ibilbide sendoa, kantu herrikoi eta tradizionalak eta sona nazioartean
Aholku batzordeak hainbat argudio hartu zituen kontuan Adarra Saria Benito Lertxundiri ematea erabakitzerakoan. Lehenbizikoa, Benitoren musika-ibilbide luzeagatik, 50 urte baino gehiago direlako. Bigarrena, konpositore gisa egin duen lan apartagatik, bere kanta asko baitaude dagoeneko herri-kantutegian. Hirugarrena, ildo berean, bere kanten oinarri askotan gai herrikoi eta tradizionalak izan dituelako. Azkenik, konpositoreak Euskal Herrian eta hemendik kanpora eta nazioartean duen sonagatik eta zabalkundeagatik.
Benito Lertxundi, Adarra Saria eskuetan duela, 2016. urtea (Argazkia: Foku).
Benito Lertxundi, Adarra Saria 2016 (Argazkia: Foku).
Euskal kantagintza berriak eman duen musikaririk emankor eta beteranoenetakoa da batzordearen ustetan, Euskal Herrian zein kanpoan miretsia eta laudatua. Ez dok amairu taldeko partaide izan zen non bide bikoitz bati ekin zion: batetik, kantu herrikoiak berreskuratzeari, eta bestetik, kantu berriak konposatzeari. Oriotarraren abesti asko herri kantutegiko klasiko bihurtu dira. Herri kantutegira ere jo izan du sarritan Lertxundik, bereziki, Zuberoakora. Horrez gain, Bretainia eta Irlandako doinuak izan ditu iturri nagusiak. Moda guztien gainetik bide pertsonala garatu du beti, modu epiko batetik intimistago batetara azken urteotan.
Benito Lertxundi Adarra Saria 2016 taldearen emanaldian (Argazkia: Foku).
Bigarren edizioan Ruper Ordorika saritu zuen Donostiako Udalak. Konpositorearen izaera modernoa eta euskal kantutegiaren zati garrantzitsu bat berreskuratu eta eguneratu izana goraipatu zuen, besteak beste, sariduna hautatzeaz arduratu zen batzordeak.
2015eko ekainaren 21ean, Musikaren Europako egunean jaso zuen Ruper Ordorikak Adarra Saria (Marijose Recalde artistak eginiko eskultura), Victoria Eugenia Antzokian izan zen ekitaldian, Eneko Goya Donostiako alkatearen eskutik. Segidan, Ruperrek aro ezberdinetako kantak eskaini zituen oholtza gainean Leo Abrahams (gitarra eta prozesadoreak) Arkaitz Miner (gitarra, mandolina eta biolina) Hasier Oleaga (bateria) eta Fernando “Lutxo” Neirarerkin (baxua) batera. Kantetako batzuk bakarka interpretatu zituen eta beste zenbait, aldiz, Mugalaris bere taldearekin.
Euskal kantutegia eguneratzea, modernotasuna eta konpositore-lanak
Batzordeak Ruper Ordorikari saria ematea aho batez erabaki zuen haren abesteko estilo propioagatik, egindako ibilbide sendoagatik, arte modernoa bultzatzeagatik, konpositore gisa egin duen lan sakonagatik eta euskal folkloreari egindako ekarpenagatik.
Informazio gehiago Ruper Ordorika
Ruper Ordorika Adarra Sariarekin, 2015. urtea (Argazkia: Foku).
Ruper Ordorika, Adarra Saria 2015 (Argazkia: Foku).
Euskal kantutegi zaharra oinarri hartu, berreskuratu eta bere estiloaren berezko modernotasunarekin eguneratu izana goraipatu zuen batzordeak. Musikari ibilbide luze eta emankorra du Ordorikak; Euskal Herriko abangoardiako artistekin ez ezik, beste jatorri eta tradizio batzuetako lehen mailako artistekin ere grabatu eta partekatu izan ditu proiektuak. Ohikoa da Ruperrek jazzeko eta rock garaikideko artista amerikarrekin elkarlanak egitea eta diskoak ekoiztea.
Ordorikak beste euskal autoreekin izan duen harremana nabarmendu zuen batzordeak, hala nola, Joseba Sarrionandia, Joxemari Iturralde eta Bernardo Atxagarekin. Azken honen testuekin osatu zuen bere lehen diskoa, Hautsi da anphora, bere ibilbide profesionalaren abiapuntu izan zena.
Ruper Ordorika, Adarra Saria 2015en (Argazkia: Foku).
Mikel Laboa musikariari eman zion Donostiako Udalak, Donostia Kulturaren bitartez, I. Adarra Saria 2014 urtean. Jaialdiaren sariduna hautatzeaz arduratu zen batzordeak Mikel Laboa saritzea erabaki zuen bere sorkuntza-lana eta euskal musikari eginiko ekarpena eta eraginagatik. Izan ere, batzordearen arabera, euskal musikak XX. mendean izan duen adierazpiderik gorenetakoa eta euskal kultura garaikideko ikur distiratsuenetakoa da Laboa.
Sari banaketa 2014ko ekainaren 21ean, Musikaren Europako Egunean, izan zen, Vitoria Eugenia Antzokian. Saria Laboaren alargun Marisol Bastidak jaso zuen. Ekitaldiaren lehen zatian, Iñaki Salvador eta Josetxo Silguero musikariak, Ainara Ortega kantaria eta Kukai dantza-taldea aritu ziren Laboaren ibilbideari omenaldia eginez. Bigarren zatian, Delorean taldea aritu zen zuzenean, eta kantu propioak eta kontzertu horretarako propio moldatutako Laboaren kantak tartekatu zituen.
Informazio gehiago Mikel Laboa
Marisol Bastida, Mikel Laboaren alarguna, Juan Karlos Izagirre alkatearen eskutik saria jasotzen (Argazkia: Foku).
Iñaki Salvador eta Ainara Ortega Victoria Eugeniaren kontzertuan (Argazkia: Foku).
Sorkuntza-lana, jeinua eta euskal musikari eginiko ekarpena
Mikel Laboa nortasun propioa zuen artista zen, bai kantugintzan baita abestien mezuetan, kontatzeko eta adierazteko eran ere. Euskal folklore tradizionalean Laboaren eragin pertsonala eta artistiko zuzena sumatzen da. Batzordeak aintzat hartu du bere kantuak euskaldun askoentzat ereserki bihurtu izana. Euskal Herritik kanpo ere izugarrizko aitorpena eta zabalkundea izan du bere lanak. Hori dela eta, artista ugarik abesten dituzte bere abestiak.
Delorean Victoria Eugeniaren kontzertuan (Argazkia: Foku).
