Albisteak

Gaur, abenduak 12, eta abenduaren 19a bitartean, XXVII. Donostia Antzerki Sariko epaimahaikide izateko izen-emate epea zabaldu da.

Egitarau mamitsua apailatu du 2026an izango den Gure Ahotsak Emakumezko Musikarien Zikloak; 5 kontzertu eskainiko ditu martxoaren 3tik 7ra, Victoria Eugenia Antzokian eta Antzoki Zaharrean. Hala, Neomak, Mirua, Chica Sobresalto, La Tremendita eta Clara Peya izango dira bi antzokietako oholtzetan eta, berrikuntza gisa, musikariekin topaketak izango dira aurtengoan kontzertuen ondoren, Victoria Eugenia Cluben, Clara Peya eta La Tremenditarekin.

61 Jazzaldirako sari bat zozkatuko dugu, Trinitate Plazan bi abonamendu irabazle batentzat (2026ko uztailak 22-26).

Seigarren ediziora iritsi da Artea abian proiektua 2025ean eta Natalia Suárez Ortiz de Zárate da aurten parte hartzen duen artista. Kutxa Fundazioak eta San Telmo Museoak antolatutako erakusketa programa honek sorkuntza garaikideari ematen dio protagonismoa, garapen fasean dauden artistei bultzada emanez, eta horrela, Natalia Suárez Ortiz de Zárateren lana ikusteko aukera izango dugu aurten Eszena iluna. Bera esna titulua duen erakusketan.

Euskadiko Filmategiak eta Donostia Kulturak Dena egiteke dago, zinema tirokatu liburu kolektiboa aurkeztuko dute, Iratxe Fresnedak koordinatua, Nosferatu Bildumaren XIII. zenbakia.

Datorren urtarrilaren 14an hasiko da Tabakaleran Nosferatu ziklo berria, Europaren erdialdeko Billy Wilder zuzendariaren figurari, XX. mendeko munduko zinemagintzaren izen gailenetakoari eskainia, Sunset Boulevard (1950) filmaren proiekzioarekin.

Mikel Zabalza Garate 1985ean Altzan bizi zen gazte orbaiztarraren atxiloketa gertatu zela 40 urte betetzen diren honetan, erakusketa bat eta bi ekitaldi antolatu dira Casares-Tomasenen abendu hasieran Mikel Zabalza Gogoan Herri Ekimenarekin batera: Non dago Mikel? erakusketa, Arg(h)itzen dokumentalaren proiekzioa eta Mikel Zabalza gogoan, 40 urte hitzaldia. Azken honetan Francisco Etxeberria forentseak eta Iñigo Iruin abokatuak hartuko dute parte.

San Telmo Museoak Bai Euskarari Ziurtagiria izango du aurrerantzean, zehazki, Zerbitzua Euskaraz agiria. Bai Euskarari Elkarteak ematen ditu ziurtagiri hauek euskararen erabilera arlo sozioekonomikoan areagotzeko helburuarekin. Euskara erabiltzeko eta sustatzeko lanean ari diren enpresak, saltokiak eta era guztietako entitateak identifikatu, aitortu eta pausoak ematen laguntzen dituen ziurtagiria da eta orain San Telmo ere horien artean dago.

Donostiako Arte Eszenikoen Feriak, dFERIAk, definituta du jada 2026ko kartela. Mai Egurza ilustratzaile irundarrarena da ilustrazioa. Orain dela gutxi zendu da Mai eta, hori dela eta, sortze-prozesua Raquel Ródenas ilustratzaile eta lagunak osatu du. Bada, gainera, 2026ko dFERIAren kartelak artista gipuzkoarra bihotzez omentzeko balio du. Haren heriotza deitoratzen dugu.

Jende ugari hurbildu da heldu eta haurrentzat antolatutako 53 ekitaldietara.

Lehenengo bi asteetako programazioak harrera arrakastatsua izan eta gero, literaturaz betetako bigarren eta azken asteburuari ekingo dio Literaktum jaialdiak. Jarduera horietako batzuen audioak entzun daitezke Berriro entzun - DK ON! atalean.

222 ilustrazio aurkeztu dira V. Literaktum Txikia Ilustrazio Lehiaketara, eta 9 lan irabazleak aukeratu dira, baita aipamen berezi bat ere.

Ostegunean, azaroak 20, jarriko du Donostia Kulturak salgai neguko arte eszenikoetako programazioa. Berrikuntza gisa, Donostia Kulturako bazkideek lehentasuna izango dute 24 orduko aurresalmenta batean (azaroaren 19an hasita) eta % 20ko deskontua hainbat ikuskizunetan.

Donostiako Giza Eskubideen 23. Zinemaldian izena emateko epea azaroaren 17tik urtarrilaren 15era bitartean egongo da zabalik.

Mauméjean Anaiak frantziar enpresak egindako beirate bat (ca. 1900) da Nabarmendutako obra berria. Pieza Novelty Caférako (Boulevard 15, Donostia) egin zuten eta 1917an kafetegia itxi zutenean bertan irekitako Trust Joyero bitxitegian mantendu zuten.