Hizkuntzak
Kike Otaegiren "Atotxa-Egia" liburua aurkeztu da
Donostia Kulturak Kike Otaegi Arizmendik idatzitako Atotxa-Egia: Harresiz kanpoko ingurune batetik hiri espazio batera liburua aurkeztu du prentsaurrekoan. Liburuak Atotxa-Egia auzoaren historia zeharkatzen du XIX. mendeko 60ko hamarkadatik XX. mendeko 70eko hamarkadara arte. Liburuaren aurkezpen publikoa azaroaren 12an izango da, arratsaldeko 19:00etan, Egia Kultur Etxean, egilearen eskutik.
Koloretan argitaratua, 295 orrialde ditu eta azal gogorra. 500 aleko tirada egin da. Donostia Kulturako liburutegien helduen sail guztietan egongo da eskuragarri, eta liburu-dendetan ere salgai egongo da 25 euroren truke.
Liburuari buruz
Lan honetan, Kike Otaegi Arizmendi egiatarrak Atotxa-Egia ingurunean egindako ibilbide historikoa eskaintzen du, Donostian, XIX. mendeko harresiz kanpoko eremua izatetik XX. mendean espazio urbano kontsolidatua izatera igaro arte. 1860ko hamarkadatik aurrera hartzen du barne, hiriko harresiak eraistea eta hiriaren zabalkuntza-prozesua abiatu zirenetik XX. mendeko 70eko hamarkadaren hasierara arte, eremuak bizitegi-eraikuntzaren ondorioz ia beteta geratu ziren arte.
Hainbat gertaera nagusi nabarmentzen dira: 1864an trenbidearen iritsiera, Urumea ibaia bideratzea eta hareatza eta paduren desagerpena. Horiek guztiak, Cortazar zabalgunearen garapenarekin batera, Atotxa-Egia hiri dinamikan integratu zuten, espazio horiek erdigune berritik menpeko auzo bilakatuz. Prozesuak barne hartu zuen azpiegitura militar, industrial eta zerbitzuen ezarpena, baita bere identitate soziala eta profil urbanoa moldatu zituzten urbanizazio-proiektuak ere.
Liburuak Atotxa-Egia batez ere langile klasearentzat diseinatutako auzo periferiko gisa duen dimentsio soziala ere azpimarratzen du. Donostia eremu honetara zabaltzeak langileentzako etxebizitza eta zerbitzu eskuragarriak kokatzeko beharrari erantzun zion, hiriaren erdigunetik aparte.
Bederatzi kapituluen bidez egituratua, ikerketak, dokumentu historiko eta kartografikoen bidez, Atotxa-Egiak Donostiarekin batera nola eboluzionatu zuen aztertzen du, bere paisaia, gizarte-ehuna eta ekonomia, bereziki industrializazioarekin eta 1950eko hamarkadatik aurrera etxebizitzen eraikuntza intentsiboarekin, nola aldatu ziren erakutsiz.
Donostia Kulturaren babesa
Sortzaileei laguntzeko ildoari jarraituz, Donostia Kulturak beste liburu batzuen edizioa babestu du. Hain zuzen ere, 2024ko maiatzan, Elbira Zipitria Andereñoa Antton Kazabon eta Jokin Mitxelena egileena; 2023an, Igeldoko historia eta istorioak, Jabier Iraola Gabilondorena; 2022an, Morlans denboran zehar = Morlans a través del tiempo, Claudio Artesano Garicanorena; eta 2020an, Burnizko potoa, Jokin Mitxelena eta Antton Kazabonen liburua. Kasu guztietan, Donostiarekin lotura duten proposamenak izan dira.
