Festen taula

Donostian iraileko lehen egunetan izan ohi dira Euskal Jaiak. Formatu txikiko kultur jarduerez osatutako programa bat, estropaden igandeen inguruan, non kultura, folklorea eta euskal kirola batzen baitira.

Donostiako estropadak 1879tik egiten dira, iraileko lehen bi igandeetan betiere, Kontxako badian. 2008tik, emakumeen estropada ere egiten da.

Santo Tomas jaia egun bakar batean ospatu ohi da: abenduaren 21ean. Egun horretan, Donostia nekazari-azoka bihurtzen da, eta txistorra izaten da hango protagonista.

Olentzero eta Mari Domingi Donostiara etortzen dira urtero abenduaren 24an, haur donostiarrek ikus ditzaten eta gutunak eman diezazkieten magiazko gau baterako desiraz beterik.

Urtarrilaren 6a ilusioz itxaroten dute milaka umek urtero, eta bezperan, urtarrilaren 5ean, Ekialdeko Errege Magoek Donostia bisitatzen dute, hutsik egin gabe.

San Sebastian egunean, urtarrilaren 20an, hiri osoa antzaldatu egiten da 24 orduz, eta danbor eta barrilen tarrapata nagusitzen da nonahi, Raimundo Sarriegiren musikarekin batera.

Jai honetan, kaldereroak Donostiara Inauterien iragarle etorri zirenekoa ospatzen da, otsailaren lehen larunbatean edota Kandelario egunaren (otsailaren 2aren) ondorengo larunbatean.

Inude eta Artzainen festa Kandelario egunetik (otsailaren 2tik) hurbilen den igandean ospatzen da; gehienetan, Kaldereroen jaiaren biharamunean. Izenak dioen bezala, artzain eta inudeen konpartsa bat da, eta dantzan egiten dute, danborrariek eta garai bateko pertsonaiek Sarriegiren doinuak jotzen dituzten bitartean.

Gure Inauterietan, elkarrekin ibiltzen dira Konpartsa Historikoak, Euskal Inauteri tradizionala eta konpartsa garaikideagoak.

San Juan gaua gau berezia da munduko hainbat lekutan, orduan ospatzen baita udako solstizioa. Donostian, jarduera nagusi eta tradizionala Konstituzio Plazan egin ohi den dantza da, zuhaitz baten inguruan.