Hizkuntzak
2026-27 ikasturteko literatura solasaldiak iralean abiatuko dira
Irailaren 14an abiatuko dira Donostia Kulturako liburutegi eta kultur etxeetan helduentzako antolatzen diren literatura solasaldiak. Beti ere aditu baten gidaritzapean, normalean hilean behin, hainbat doako saio egiten da aipatu tokietan eta baita hiriko beste leku batzuetan ere. Liburu horiek maileguan eska daitezke Donostiako liburutegietan, eta zenbait kasutan liburuak eLiburutegia plataformatik deskargatzeko aukera egon daiteke.
19 solasaldi izango dira guztira, hiri osoko hainbat gunetan banatuta eta lau hizkuntzatan: euskaraz, gaztelaniaz, ingelesez eta frantsesez.
Tertulia bakoitza aditu batek gidatuko du. Euskarazkoetan Iñigo Aranbarri, Mireia Delgado, Aritz Gorrotxategi, Lur Korta, Ane Mayoz, Imanol Mercero, Iratxe Retolaza, Edu Zabala eta Juan Luis Zabala ariko dira dinamizatzaile lanetan; gaztelaniazkoetan Lola Arrieta, Ylenia Benito, Ana Merino, Liss Evermore, Javier Mina eta Juan Manuel Díaz de Guereñu; ingelesezkoa solasaldia Slawka Graboskak gidatuko du, eta frantsesezkoa Miren Garmendiak.
Zenbait solasaldi elkarteekin elkarlanean antolatzen dira. Esaterako, Ikasbide Kultur Elkartearen egoitzan egiten den solasaldia, edo Plazara Goaz euskara batzordearen laguntzaz antolatutakoa Intxaurrondon.
Saio batzuetara idazleak gonbidatzen dira. Euskarazko solasaldietan lehen gonbidatua Juan Garzia izango da: urriaren 6an izango da gurean Erbeste liburuari buruz aritzeko. Gaztelaniaz, berriz, lehena Luna Miguel izango da: urriaren 20an, Incensurable liburuaren inguruan arituko da irakurleekin.
Topaldi batzuetan denetariko testu literarioak jorratzen dira; beste batzuetan, aldiz, gai edo genero bati buruzkoak dira. Esaterako, Aiete Kultur Etxean literatura eta zinemaren arteko lotura izango dute ardatz, eta Intxaurrondon, berriz, komikiari eskainitako saioak egiten dira euskaraz zein gaztelaniaz. Egia Kultur Etxean zientzia-fikziozko tertulia antolatzen da, eta Haur Liburutegi Nagusian haur eta helduentzako saioak daude, komikiez gozatzeko batetik, eta haur literaturan sakontzeko bestetik.
Irakurketa Errazeko taldeek aipamen berezia merezi dute, hainbat arrazoi direla medio, irakurtzeko zailtasunak dituzten pertsonei zuzenduta baitaude. Talde hauek modu iraunkorrean biltzen dira Liburutegi Nagusian (Alderdi Eder), Ernest Lluch (Amara) eta Egia kultur etxeetan. Liburutegiaren arabera, talde hauek euskararen ikaskuntzan zailtasunak dituzten pertsonentzat, gizarte-bazterketa arriskuan dauden kolektiboentzat —Gurutze Gorriarekin lankidetzan—, edo desgaitasuna edo funtzio-aniztasuna duten pertsonentzat, besteak beste, bideratuak izan daitezke.
Jarduera irekiak, doakoak eta parte-hartzaileak dira, eta herritarrei aukera ematen diete literatura inguruan elkartu eta solas egiteko giro hurbil eta aberasgarrian.
Jarduerak literatura solasaldiak loturan emango dira ezagutzera, gutxi gorabehera, hilabete bat lehenago.
