Hizkuntzak
Sara Uribe-Etxeberriaren "Kuntzak eta kerak" poemarioaren aurkezpena
Gaur goizean, ekainak 4, Donostia Kultura VIII. Poesia Sariko liburua aurkeztu da. Sara Uribe-Etxeberria Atxurraren Kuntzak eta kerak kaleratu du Balea Zuria argitaletxeak.
Aurkeztu den liburua Sara Uribe-Etxeberriak argitaratzen duen lehenengoa da, eta Donostia Kultura Poesia Lehiaketako VIII. sari nagusia eskuratzeagatik plazaratu da. Zumaian 2005ean jaioa, Zuzenbide ikasketak egiten ari da Euskal Herriko Unibertsitatean (UPV/EHU). Bestalde, 2022 urtean R.M. Azkue Literatura Sarietan, poesia arloan, lehen saria irabazi zuen. 2022 eta 2023 urteetan Urruzuno Literatur Lehiaketan poesia arloan saritua izan zen.
Epaimahaikideek (Eli Tolaretxipi, Itxaro Borda eta Aritz Gorrotxategi) balorazio hau egin zuten saria ematerakoan: “Mundu eta atmosfera propioa dauka liburuak, poesiaren eta zientziaren arteko bidegurutze moduko bat. Lirikotasun landuz egiten du bidea, irudi eta gogoeta iradokigarriz betea. Hizkuntza aldetik, ezohiko heldutasuna eta batasuna dauka tonuari eta egiturari dagokionez. Erreferentzia askotarikoak baliatzen ditu, hurbilak zein urrutikoak, arruntagoak zein jasoagoak. Askotariko gaiak agertzen dira liburuan zehar: poesiari buruzko gogoetak, belaunaldi kontuak, mina, kezka sozialak, giza izaerari buruzko gogoetak... Era berean, originaltasuna eta arriskua bilatzen du poemak josteko orduan.”
Egilea zuzenean ikusteko aukera izango dugu ekainaren 9an, iluntzeko 19:00etan, Victoria Eugenia Cluben egingo den 2025eko Poesia eta Pentsamendua programako errezitalean.
Poesia zabaldu eta idazle gazteen lanari bultzada emateko bokazioarekin sortu zuten Balea Zuria argitaletxeak eta Donostia Kulturak DK Poesia Lehiaketa (aurreko edizioetako informazioa duzue loturan).
