Friki Harrotasunaren hilabetea Egiako Liburutegian

Friki Harrotasunaren jaialdiaren baitan jarduera paraleloak ere izango dira hilabetean zehar. Jarduera horien bidez, Egia auzoko neska-mutilek liburutegia apainduko dute "frikien kanonek agintzen duten bezala.

Hona hemen Egiako Liburutegian prestatutako programa (ekintza guztiak 18:00etan izango dira):

• Maiatzak 16: Mahai Jokoen Erauntsia. Frikiegiako leloetako bat hauxe da: "friki bat bera ere ez bere mahai jokorik gabe", beraz, taula eta dadoaren festa izango da.

• Maiatzak 23: It's only rol, but i like it . Rol jokoak gustoko dituztenentzat, partida batzuk antolatu dituzte auzoko gaztetxoekin, bertako beteranoenekin eta erdian daudenekin. Aukeratutako gaia hau da: Nor da hiltzailea, Marple anderea?

• Maiatzak 28: Kasete birbobinatze III. Mundu Txapelketa Bic Boliarekin. Beso eta eskumutur boteretsuenak azkarrenak izateagatik borrokatuko dira.

• Maiatzak 29: Urteroko hitzorduan hutsik ez egiteko, aurten ere Friki Zozketa Handia egingo da. Bertan, parte hartzaileek liburutegiko opari esklusibo bat irabaz dezakete. Hainbeste urteren ondoren, denetarik oparitu dute: katiluak, kamisetak, sukaldeko mantalak, eskuoihalak... 2025ean, berriz, opari berezia: giltzatakoa eta diru-zorroa.

Zozketarako txartelak hainbat bidetatik lor daitezke:

1. 1. Liburutegiko dokumentu frikiak maileguan hartuta, hala nola telebista-serieak, komikiak, fantasiazko eta zientzia fikziozko liburuak, film fantastikoak eta horrelako lanak.
   2. Friki-Trivialean egunero parte hartuz.
   3. Poster-Frikietako pertsonaiak asmatuz.

Dagokion txartelaz gain, parte hartze bakoitzeko txapa bat emango da, friki diseinu batekin apaindua.