'Bitxikeria, munstro eta makinen kabinetea' erakusketa irekita

Erakusketan, azken 25 urteetan etxe horrek egindako lana ikusi ahal izango da. Betiere stop motion teknikaz baliatuta, hainbat film labur egin dituzte, besteak beste, Encarna (2003), The Werepig (2008), Vicenta (2010), Paralelos (2022), La valla (2024) eta El aspirante (2025), eta Pos eso (2014) film luzea, guztiak Samek zuzenduak ekoiztetxearen burua hasieratik. Istorio fantastikoak dira, Espainia cañí eta folklorikoenetik distopia kafkiar eta ilunenetara eboluzionatu dutenak, beldurra, umorea eta absurdua nagusi diren unibertsoetan. Pantaila bitxikeriekin, munstroekin eta makinekin betetzen. Lehendik ere, Asteak erakusketa bat eskaini zion bere lanari, 2009an.

Okendo Kultur Etxean Conflictivos Productionsen lanaren prozesu osoa ikusi ahal izango da, storyboardak, plastilinazko panpinak, maketak, dekoratuak, atrezzoko objektuak…

Azaroaren 3an Fran Sánchezek zuzendutako Conflictivos productions, 25 años fracasando con todo éxito (2024) dokumentala proiektatuko da Okendoko areto nagusian.

Beldurrezko Astean zehar Samek bisita gidatu bat egingo du erakusketara.

Conflictivos Productions

“Txikitatik, Sam zuzendari eta ekoizlearen ametsa zen bere irudimenetik sortzen ziren istorioak pantaila handira eraman ahal izatea. Bere anbizioa oso handia zen baina ez zuen ia baliabiderik; laguntza behar zuen etsi-etsian. Urte askoren ondoren, Arte Ederretako ikasketak egiten ari zela konturatu zen bere ametsak egia bihurtzeko modu bakarra beste ikaskide batzuekin lankidetzan aritzea zela; hor jaio zen Conflictivos Productions, animazioko filmak egiteko irrikan zeuden ikasle batzuk elkartuta.

Flora Cuevasen etorrerarekin, lagun talde bat izatetik ekoiztetxe bat izatera igaro ziren, gero eta proiektu luze eta konplexuagoei heltzeko eta arrakastaz aurrera ateratzeko gai zena; haietako batzuk Pos eso (2014) film luzea egitea bezain konplikatuak.

Film luze horren ondoren, estetika hori atzean utzi zen hain karikaturizatua ez den estetika bati heltzeko; gaiak fantastikoa izaten jarraitzen du, baina jorratzen diren arazoak dira istorioen benetako protagonistak, batez ere espezie gisa aurrez aurre ditugun erronka handiak: kutsadura, arrazakeria edo multinazionalen neurrigabeko gutizia. Helburuak entretenitzea izaten jarraitzen du, nahiz eta dibertigarria dena konplikatu bihurtu; umorea hor dago oraindik, baina orain lerro artean bilatu behar den, eta, jakina, oso beltza da.

Estiloaren bilakaerarekin batera, tematika askoz gordinago bihurtu da, jorratzen diren gaiekin bat etorriz, eta erantzunak ematen saiatzen ez bagara ere, gutxienez galderak sortzeko gaitasuna izatea gustatuko litzaiguke”.

Sam