Enrique Monteroren 'Maldita valiente' Antzerkigintza Berrien 2026ko lan hautatua

2026an Antzerkigintza Berriak programan parte hartu duten egileak honako hauek dira: Juan Sánchez Gómez, Ana Maestrojuan, Irati Morán Martinez, Albar Cirarda Larrañaga, Claudia Cos, Haizea Águila Mínguez, Itxaso Gil Iglesias eta Enrique Montero, bera.

Gasteizko Principal Antzokiak, Bilboko Arriaga Antzokiak eta Donostiako Victoria Eugenia Antzokiak, 2012an sortutako ANTZ3RKIZ markapean bilduta, Antzerkigintza Berriak programa bultzatzen dute. Horrela, hiru antzokiek antzeztokietan ekoizten eta programatzen dute pieza irabazlea. Programaren helburua da euskal dramaturgia baten eszenaratzea sustatzea, sorkuntzaren munduari laguntzea eta nolabaiteko entitateko ikuskizunen ekoizpena erraztea, kontratazio-baldintza onargarrietan.

Epaimahaiak honakoa nabarmendu du aukeraketan: "Proposamena nabarmentzen da bere eraikuntza dramaturgikoaren sendotasunagatik, egitura ondo artikulatua eta narrazio-erritmo eraginkorra izateagatik baita bere ahots bereziagatik eta gaiari heltzeko modu pertsonal eta zuzenagatik ere. Testua bereziki baloratzen da erregistro dramatikoen eta komikoen arteko oreka lortzeko duen gaitasunagatik; izan ere, koherentzia orokorrari eusten dio, eta tonu-aldaketek ez dute gatazka nagusiaren sakontasuna ahultzen.

Gainera, antzezlana esperientzia pertsonal batean oinarrituta egoteak benetakotasuna eta egiazkotasuna ematen dizkio istorioari, eta haren giza dimentsioa zein emozionala indartzen ditu. Zentzu horretan, gaia lantzeko erabilitako sentikortasuna azpimarratzekoa da, baita gai konplexuei zuzenean heltzeko gaitasuna ere, alderdi zailenei muzin egin gabe.

Ikuspegi guztiz teatraletik, lanak eszenaratze-potentzial handia erakusten du, bai antzezpenari begira eskaintzen dituen aukeretan, bai zuzendaritzaren eta eszenaratzearen bidez dimentsio berria hartzeko duen gaitasunean.

Azkenik, antzezlana taularatzeko bideragarritasuna positiboki baloratzen da; lau antzezlerentzat pentsatuta dagoenez, ekoizpen-baldintzek aukera ematen dute, printzipioz, baldintza egokietan garatzeko. Arrazoi horiengatik guztiengatik, Maldita Valiente da ebaluatutako ezaugarri dramaturgiko, literario eta teatralak hobekien biltzen dituen lana. Bereziki nabarmentzen da egitura-sendotasunagatik, idazketa-kalitateagatik, erregistroen arteko orekagatik, gizatasunagatik, sentikortasunagatik eta antzerki-potentzialagatik; ezaugarri horiek dira, hain zuzen, hautaketa horren oinarria."

Enrique Montero

Enrique Montero aktore eta antzerkigile madrildarra da. Ikus-entzunezko Gidoien Sorkuntzan Masterra UNIRek, Elkarlaneko Antzerkian eta Sorkuntzan Masterra Erresuma Batuko Rose Bruford Collegek eta Testu Interpretazioan Graduatua RESADek. Urtebeteko espezializazioa du Pragako Antzerki Fakultatean Antzerki Alternatiboan eta Txotxongiloetan.

Egile gisa estreinatutako bere lanetako batzuk honako hauek dira: Óscar quiere ser una Cigala (2017), Desdémona Dance Party (2018), Gansos o Todos dicen la verdad (2020) edo Gente encerrada en sitios (2021) -azken hau ere berak zuzenduta-. Aktore gisa lan egin du #LaJoven kateko hainbat produkziotan, hala nola Fuenteovejuna, Hey Boy Hey Girl (Jordi Casanovas) edo Invasión (Guillem Clua).

Azken urteotan Havi Potter y la parodia musical edo Titanic (Brodwei) edo Ya me has toque el cuento (ArteAtroz eta Evoca Producciones) bezalako komedietan parte hartu du. Gaur egun, Vaga y Maleanta (2023) bakarrizketa idatzi eta interpretatzen du, gure LGTBIQ+ nagusien omenezko kabaret dokumentala. Oniria Teatroko kidea da 2020tik, eta konpainia horrekin Rutas Teatralizada del Teatro La Latina eta Mátanos a todos komedia berria estreinatu zituen 2025ean.