Sarrerak
San Sebastián, ciudad de la cultura

Museoaren eta Kutxa Fundazioaren lankidetza hitzarmen berria, sormena bultzatu eta argazki funtsak tratatzeko

Astelehena, 2019(e)ko Abendua(r)en 09-(e)an

San Telmo Museoak eta Kutxa Fundazioak lankidetza harremana berritu dute akordio berri bat sinatuz. Kutxa Fundazioak kolaboratzaile pribatu gisa laguntzen dio museoari, zaharberritu eta zabaldu zenetik, eta akordio honek esanahi berri bat ematen dio harreman horri, bi erakundeek interesa duten bi arlo indartzera bideratutako egitasmoen bidez: argazki funtsen tratamendua eta sorkuntzari bultzada, Artea Abian proiektuan zehaztuko dena.

Artea abian

Artea Abian ekimenaren bidez bi erakundeek beren ibilbide profesionalaren lehen urteetan dauden eta beren obraren aurkezpen monografikoari aurre egiteko esperientzia nahikoa duten artistei laguntza eta babesa eskaini nahi diete. Helburu nagusia gune instituzional edo museistiko batean lehen erakusketa indibiduala egitea erraztea da. Ekimen honek arte plastikoen eta arte bisualen testuinguruan dagoen behar bati erantzuten dio, hau da, artistentzako erakusketa espazioak eta aukerak inplementatzeari.

Proiektuaren esparru geografikoa Gipuzkoako lurralde historikoa da, artistaren jatorri eta/edo jarduera leku gisa. Horrek esan nahi du artista hautagarriak direla lurraldean jaiotako edo hari lotutako pertsonak, lotura hori modu zabal eta irekian ulertuta.

Artea Abian proiektuak San Telmo Museoak urtero Laborategian egin beharreko erakusketa bat egitea dakar, ahal dela artista batena, lan metodoei eta baliabideei dagokienez ingurune profesionalizatua eskainiz. Erakusketa, oro har, urteko azken hiruhilekoan egingo da, eta espazio horretan programatu ohi diren gainerako erakusketen antzeko iraupena izango du.

Nagore Amenabarro izango da Artea Abianen lehen edizioko artista

Argazki funtsak tratatzeko lerroa

Argazkigintza gero eta garrantzi handiagoa hartzen ari da, bai museoek gordetzen dituzten bildumetan, bai programatzen diren erakusketetan.

Kutxatekan gordetako bildumak 1.800.000 irudi baino gehiago ditu San Telmo Museoarena ere asko hazi da azken urteotako dohaintzei esker. Bi kasuetan, balio dokumental handiko materiala da, ezinbestekoa gure iragana ezagutzeko eta era guztietako alderdiak ilustratzeko: landa garapena, hirikoa, industriala, bizimoduak, paisaia, pertsonaiak, gatazkak...

Horregatik, material horien azterketa espezifikoa modu sistematiko eta zorrotzean egin behar denez, eta material horiek behar bezala kontserbatuko direla eta gero zabalduko direla bermatu behar denez, beharrezkotzat jo dugu proiektu bat ezartzea, non, hitzaldi, tailer eta/edo topaketen bidez, beste zentro batzuen eta beste profesional batzuen esperientzia ezagutu ahal izango dugun, kontserbazioari, zaharberritzeari, digitalizazioari, dokumentazioari, biltegiratzeari, irisgarritasunari, zabalkundeari edo argazki funtsei buruzko beste edozein alderi dagokionez.

Horrela, gure bildumen azterketa, kontserbazioa eta zabalkundea ahalik eta modurik egokienean bideratzea lortuko dugu, eta, aldi berean, informazio eta prestakuntza hori eskura izatea ahalbidetuko diegu argazki-ondarea ere gordetzen duten lurraldeko erakunde eta pertsonei, etorkizuneko lankidetzak erraztuko dituen profesionalen sarea osatuz.

Jardunaldiak, apirilean

Helburu horiekin, jardunaldi batzuk egingo dira San Telmo Museoan 2020ko apirilaren 20tik 23ra bitartean, honako alderdi hauek jorratuko dituen programa batekin: argazkien identifikazioa, arriskuak eta narriadurak; antzinako argazki-prozedurak; eta argazkien kontserbazioa, erakusketa eta zaharberritzea. Jardunaldietan arlo horietako profesionalek hartuko dute parte: Rosina Herrrerak, Raquel Esteban Vegak, Cristina Martinez Sanchok, Joaquin Paredes Pirisek eta Jabi Soto Madrazok.

2020. urtearen hasieran programa xehetasunez ezagutaraziko dugu, jardunaldiaren prezioarekin eta izena emateko moduarekin batera.

Iruzkina idatzi

Segurtasun kodea
Freskatu