Ados Teatroaren "Maitasunaren ostean, maitasuna" antzezlanak irabazi du XVI. Donostia Antzerki Saria

Ados Teatroaren Maitasunaren ostean, maitasuna antzezlanak irabazi du Donostiako Udaleko Euskara Zerbitzuak eta Donostia Kulturak antolatzen duten XVI. Donostia Antzerki Saria. Martxoaren 27an, Antzerkiaren Nazioarteko Egunean, egingo da saria emateko ekitaldia, 19:30ean, Victoria Eugenia Antzokian. Ekitaldiaren hasieran saria emango da eta ondoren lan irabazlea eskainiko da.

Talde irabazleak 10.000 euro eta Baroja Colleten artelana (eskulan paperean sortutako marrazkia) jasoko ditu. 8.000 euro orain eskuratuko ditu eta gainerako 2.000 euro jasotzeko, 2018. urtea bukatu aurretik euskarazko antzerki lan berri bat eskaini beharko du Donostian. Horrez gain, ikuskizun berri hori prestatzeko (proba saioak egiteko eta abar) bi aste egin ahal izango dituzte iparraldeko Harri Xurin dagoen produkzio gunean gastu guztiak ordainduta. Harri Xuri produkzio gunea sormena lantzeko eta sustatzeko gunea da eta bertan leku berezia eskaintzen zaio euskarazko sorkuntzari.

2015ean 17 antzerki lan eta 6.214 ikusle

Donostiako Udaleko Euskara Zerbitzuak eta Donostia Kulturak ahalegin berezia egin zuten 2015ean euskarazko antzerkigintza sustatzen jarraitzeko. Datuek agerian uzten dute egindako ahalegina: 2015ean Donostian helduentzako 17 antzerki lan eta 48 emanaldi eskaini dira eta guztira 6.214 ikusle izan dira emanaldi horietan.