Rosa Valverde. Arte kaxak, San Telmoren erakusketa berria

Rosa Valverde. Arte kaxak tituluarekin, artista donostiarraren 52 arte kaxekin osatutako erakusketa monografikoa zabalduko da bihar, urtarrilak 27, San Telmo Museoan. Laborategian izango da ikusgai, doako sarrerarekin, martxoak 13 arte. 

Rosa Valverde (Donostia, 1953-Azkaine, 2015) artistak mota ezberdinetako sorkuntza artistikoak jorratu zituen bere ibilbidean: margolanak, marrazkiak, grabatuak, objektu-eskulturak... eta baita arte kaxak, azken hauek batez ere 2000. urtetik aurrera. Erakusketaren komisarioa Isabel Sagüés da. Guztira, egileak sortutako guztien ia erdia, 52 kaxa, bildu dira, bisitariari haren unibertsora hurbiltzeko aukera emango diotenak. 1975 eta 2012 bitartean sortutako kaxak dira.

Erakusketa hau proiektu handiago baten barruan kokatzen da, Baginen bagara, bere helburuen artean gure inguruko artistak ikusaraztea duena. Rosa Valverderen lana lehenago ere ikusi ahal izan da San Telmon – besteak beste, artistak 1978an museoan egin zuen bakarkako lehen erakusketan –, eta orain, kutxak erakusteko aukera aprobetxatuz, formatu hori landu zuen sortzaile donostiarrarengan zentratutako ikerketa-kasu gisa planteatzen da, bere berezitasuna erakusteko.

Kaxak dira, ziur aski, Rosa Valverderen sorkuntzarik intimoenak eta pertsonalenak. Hainbat objektuz osaturik daude, baina objektuek, bere horretan, solte, ez daukate baliorik. Objektu aurkituak dira, adiskideen opariak batzuetan edo bazar eta azoketan topatutakoak bestela. Horiek uztartzeko erabilitako lengoaia berezkoa da, aurreiritzirik gabea, erabateko askatasunaren jarreratik landua; funtsezko osagaiak dira umorea eta ironia. Sorkuntza hauek kitscha gogorarazten dute batzuetan, edo gauza kursiez baliatzen dira ziztatzeko, kontrasteak sortzeko.

Erakusketarekin batera katalogo bat argitaratu da eta jarduera ezberdinak antolatu dira.