2021-2022: irailaren 6tik aurrera 508 ikastarotan matrikulatzeko aukera

Donostia Kulturak 2021-2022 ikasturterako duen prestakuntza-eskaintza aurkeztu du gaur goizean. 508 ikastaro (480 helduentzat eta 28 haur eta gazteentzat) izango dira guztira, Donostiako kultur etxeetan eta Liburutegi Nagusian emango direnak. Ikastaroen matrikulazioa 2021eko irailaren 16an (arratsaldeko 16:00etan) hasiko da eta hilaren 26an bukatuko da. Edozein kultur etxetan eta Donostia Kulturaren webgunean egin izan ahalko da.

Eskaintza pdf formatuan daukagu kontsultatzeko moduan (kultur etxeetan irail hasieran izango da paperean) eta informazio osoagoa iraila hasieran bertan www.donostiakultura.eus/ikastaroak helbidean.

Informazio gehiago:

• 2021-2022: Ikastaro eskaintza (pdf)

• 2021-2022: Egile ikastaro eskaintza (pdf)

Puntu aipagarrienak

2021-2022 kanpainan COVID-19ak eragindako egoerari eskaintza egokitzearekin, eduki beharreko kontuarekin eta Donostia Kulturak hiritarrentzat antolatzen dituen jardueretan izan beharreko erantzunkidetasunarekin lotutako erabakiak hartu dira.

Osasun-adierazleen hobekuntzak eta gaur egungo txertaketa-erritmo onak baikorrak izatera garamatza, eta aurreko ikasturtean osasun-krisiaren ondorioz mugatu ziren ikastaro eta talde eskaintzaren zabaltasuna berreskuratzen joateko aukera dugu.

Ikastaroen iraupenari dagokionez, kanpaina honen ezaugarri nagusia da ikastaro orokorretan lau hileko eta ikasturteko osoko eskola-aldiak berreskuratuko direla, 2020-21 ikasturtean hiruhilekoak edo trinkoak izan baitziren.

Era berean, osasun-arauekin uztartzeko zailtasunagatik iazko eskaintzatik kendu behar izan ziren zenbait ikastaroen itzulera azpimarratu nahi da. Ikasturteko bigarren lauhilekoan egingo dira, 2022ko otsailetik ekainera, beti ere osasun baldintzek ahalbidetzen badituzte. Horien artean, Ernest Lluch K.E-ak antolatutako Ardo dastaketa eta Italiako sukaldaritza ikastaroak.

Nolanahi ere, programazioaren diseinuan eta antolaketan kontuan hartu dira unean uneko edukiera-mugak, osasun agintariek eta Donostia Kulturak ezarritako segurtasun- eta higiene-arauen arabera . Edukiera horiek zorrotz errespetatuko dira eta ikasleei gogoraraziko zaizkie COVID-19 gaixotasuna hedatzea saihesteko higiene eta segurtasun neurriak.