Berriak

Donostia Kulturaren guneetan datozen egunetan Emakumearen Nazioarteko Egunaren harira antolatutako hainbat ekitaldi bildu dugu albiste honetan.

Donostia Kulturako sarrera-salmenten webguneak espazio berri bat du, Donostia Kulturak bere historian zehar kaleratu dituen zine-argitalpenak salgai jartzeko.

Gasteizko Principal Antzokiak, Bilboko Arriaga Antzokiak eta Donostiako Victoria Eugenia Antzokiak, seigarren urtez, Antzerkigintza Berriak programa jarri dute abian, sortzen ari diren antzerkigileei eta beste arlo artistiko batzuetatik etorrita (literatura, zinema...) sormen eszenikoan menturatu nahi duten sortzaileei antzerkiaren ingurunera hurbil daitezen errazteko asmoz. Izena emateko epea 2021eko martxoaren 31n amaituko da, 18:00etan.

Terra Willy (2019), Asto Erregea (2018) eta Vitoria, 3 de marzo (2019) dira Donostiako Giza Eskubideen 18. Zinemaldian ikastetxeei eskainiko zaizkien filmak. Zinemaldia apirilaren 23tik 30era izango da. Aurten, COVID-19ak sortutako egoera dela-eta, saioak ez dira presentzialak izango: ikasleek geletan ikusi ahal izango dituzte online moduan zinemaldian zehar, apirilaren 26tik 30era. Eskaintza doakoa da eta www.zinemaetagizaeskubideak.eus webgunearen bidez eman dezakete ikastetxeek izena martxoaren 26 arte. Izen ematea mugatua izango da aurreikusitako bistaratze kopurua bete arte.

Laugarren ediziora iritsi da HAU. Euskal Herriko objektu tradizionalaren lehiaketa eta txokolate-ontzia izan da aurtengo objektua, eta apirilaren 26ra arte egongo da zabalik proiektuak aurkezteko epea. Lehiaketa diseinuaren alorrean diharduten ikasleei, profesionalei edo kolektiboei zuzenduta dago (industria- eta produktu-diseinua, arkitektura, ingeniaritzak, arte ederrak, etab.).

Joan den abenduan, San Telmo Museoak José Luis Zumeta artistak 1989an diseinatutako zeramika-iturri baten kontserbazio eta zaharberritze tratamendua egin zuen. Iturri hori grafiti ugariren atzean ezkutatuta zegoen, eta, beraz, desagertzeko arriskuan. Bi hilabete geroago, iturriari berriro eraso diote grafitiekin.

Piztutako interesari ahalik eta hoberen erantzuteko helburuarekin, datorren ostiralean, otsailak 26, Aranzadi Zientzia Elkarteak antolatutako aurtengo Arkeologia Jardunaldietako azken ekitaldia Antzoki Zaharrean egingo da.

Donostia Kulturak salgai atera du gaur udaberriko aurrerapen bat. Guztira, 13 ikuskizun dira (5 antzezlan, 5 kontzertu eta 3 dantza ikuskizun) Victoria Eugenia Antzokian, Antzoki Zaharrean, Egiako Gazteszenan eta Lugaritzeko Imanol Larzabal aretoan emango direnak. 

San Telmo Museoak areto berri bat zabalduko du otsailaren 23tik aurrera Urgullen magalean erakusketan. Areto horretan,  Erraldoi gorria. Kartografia lainotsua proiektuaren instalazioa egongo da ikusgai maiatzaren 2ra bitarte. Piezaren izenburuak, Erraldoi Gorria, izar baten bizitzako etapa ezberdinei egiten die erreferentzia. Mugimenduak, arrastoak eta eraldaketak.

Donostia Kulturak 2020ko MEMORIA publikatu du. Egoera honetan, inoiz baino gehiago, nabarmentzekoa da Donostia Kulturak dinamizatzaile gisa duen papera.