Berriak

Literaktum letren jaialdiak azaroaren 8tik 21era izango du aurtengo hitzordua. Sail anitz eta proposamen berriekin dator eta, beti bezala, kolaborazio-sare zabalarekin gauzatuko da. Literaturaren eta gizartearen arteko konexioak arakatzeko ahaleginari helduko dio aurten ere jaialdiak. Hala, memoria da aurtengo gaia. Literatura eta memoria.

Literaktumek jarduera osagarrien programa zabala antolatu du, non instalazio artistikoak, ikastaroak, irrati tailerrak, ikuskizunak eta erakusketak aurkitu daitezkeen.

Ernesto Murillok, Simonides izenez ere ezaguna denak, bere margolanen bilduma bat aurkezten du Kutxa Kultur Plazan. Erakusketa antolatu da Fantasiazko eta Beldurrezko Zinemaren 32. Astearekin elkarlanean, eta zabalik egongo da Kutxa Kultur Plazan, abenduaren 12ra arte.

Jazz kontzertuz gainezka dator azaroa Victoria Eugenian, nazioarteko hainbat izen esanguratsu tarteko. Bost kontzertu izango ditugu azaroan eta beste bi abenduan zehar.

ABONUEN 2. SALMENTA

Urriak 25 astelehena. PRESENTZIALKI BAKARRIK BI ANTZOKIETAKO LEIHATILETAN (Antzoki Zaharra eta Victoria Eugenia) Ordutegia: 11.30-13:30 / 17:00-20:00 (agortu arte)

Gipuzkoatik kanpoko bezeroentzat bakarrik salmenta telefonikoa 943 48 18 18 telefonoan (ordutegi berdina)

Donostiako Fantasiazko eta Beldurrezko Zinemaren 32. Astea urriaren 29tik azaroaren 5era izango da. Veneciafrenia eta Mona Lisa and the Blood Moon pelikulek hasiera eta amaiera emango diote Asteari Antzoki Zaharrean.

Aurten ere, Donostia Kulturak, Tolosako Ekinbide Etxearen laguntzarekin, Abesbatzen Astearen edizio berri bat antolatu du. Tolosako Abesbatzen Lehiaketa ospatzen den bitartean, bost emanaldi eskainiko dira 2021eko urriaren 27tik azaroaren 3ra Donostian: Altzan, Loiolan, Grosen, Ibaetan eta Amaran. Abesbatzen Aste honen helburua donostiarrengan musika korala sustatzea da.

Udazken honetan ere, Ernest Lluch Kultur Etxeko apustu nagusia literaturak jarraituko du izaten. Azaroaren 8tik 21era izango den Literaktum jaialdiko saioez gain, hainbat literatur urteurrenei buruzko inguruko hitzaldiak izango dira bertan: Dostoeivski, Flaubert eta Baudelaire (hiruren jaiotzaren 200. urteurrena betetzen baita aurten) eta Dante (heriotzaren 700. urteurrena).

Euskarazko formatu txikiko antzerki sorkuntza eta ekoizpena bultzatzeko 2022ko Poltsiko Antzerki Sorkuntza izeneko programak badu dagoeneko sariaren irabazlea. Jasotako proiektuen artean, epaimahaiak saria eman dio Piszifaktoria Ideien Laborategiaren Ivanka antzezlanari.

Bigarren saria, berriz, eman gabe geratu da.

Urriaren 15etik urtarrilaren 9ra arte ikusgai izango da Oier Iruretagoiena artistaren lanekin osatutako San Sebastian eta fantasma erakusketa, San Telmo Museoko Laborategian, doako sarrerarekin. Erakusketa hau Artea abian izeneko egitasmoaren barruan kokatzen da.