Berriak

San Telmo Museoak Magia, materia eta beharra aurkezten du, 2021eko uztailaren 1etik aurrera museoko erakusketa iraunkorrean ikusgai jarriko dena eta Museo Bikoitza programaren parte dena. Lan bideografiko hau erakusketa iraunkorrean proiektatuko da, Industria, aldaketaren eragile atalean.

Bideoaldiaren 33. edizioak Antzoki Zaharrean elkartuko gaitu ekainaren 18ko arratsaldeko 19:00etan eta sarrera doakoa izango da. Emanaldirako gonbidapenak Antzoki Zaharreko leihatilan jaso ahal dira ekainaren 11tik aurrera (11:30-13:30). Pertsona bakoitzeko gehienez 2 gonbidapen eskuratu ahal izango dira. Ekitaldiak edukiera mugatuta izango du aurten eta bertaratzen diren guztien segurtasuna bermatzeko beharrezkoak diren osasun-neurri guztiak hartuko dira.

Bide publikoan 2021eko udan egingo diren kultur ekitaldiak direla eta, batetik, ekitaldi horien autofinantzaketa hobetzeko, eta, bestetik, hiriko jai-egutegiarekin lotura ukaezina duten eta azken urtean geldirik eta diru-sarrerarik gabe egon diren enpresa txikiei beren lan-jarduera berreskuratzen laguntzeko helburuekin, Donostia/San Sebastián Festak erakundeak, gaur egungo egoerak eskaintzen dituen aukeren arabera, hainbat feria aparatu jarriko ditu Donostiako zenbait lekutan.

Donostiak udako kultur denboraldia irekiko du, eta eskaintza "aberatsa, zabala, anitza, irisgarria, publiko guztiarentzat, dinamikoa eta hurrengo hilabeteetako osasun egoera aldakorrera egokituta egongo da". Hala adierazi du gaur Eneko Goia alkateak, Donostiak datozen hiru hilabeteetan eskainiko duen kultur programazioaren aurkezpenean.

Ekainaren 10ean Donostiako Fantasiazko eta Beldurrezko Zinemaren 32. Astean lanak aurkezteko epea irekiko da. Aurtengo jaialdia urriaren 29 eta azaroaren 5a bitartean egingo da. Izena emateko azken eguna abuztuaren 15a izango da.

San Telmo Museoak azken hilabeteetan klaustroan izan dituen kanoiak igo ditu gaur museotik Urgullera, Motako gazteluaren zabalgunera. Horiek dira Urgull mendia udara begira prestatzeko azken ukituak. Kanoiak mendian kokatzearekin batera museoak horien inguruko informazioa argitaratu du webgunean eta hitzaldia eta joko bat ere antolatu ditu, herritarren eskura jarriz hiriko ondarearen eta historiaren ezagutza.

Ziur Urgullen barrena dauden kanoiak hamaika aldiz ikusi dituzula, etxekotzat ditugu, eta seguru baduzula haiekin ateratako txikitako argazkiren bat, baina zenbat dakizu horiei buruz?

Aurten, Carlos Areces aktorea da protagonista urriaren 29tik azaroaren 5era izango dugun Fantasiazko eta Beldurrezko Zinemaren 32. Astearen kartel ofizialean. Posterrak omenaldi egiten dio La cabina film ertain legendarioari; José Luis Garcik idatzia eta Lasarteko zinemagile Antonio Mercerok 1972an zuzendua.

Donostia Kulturak salgai jarriko ditu bihar, ekainak 4, uztailean izango diren bost ikuskizun: bi antzezlan, kontzertu bat, bertso emanaldi bat eta dantza ikuskizun bat). Victoria Eugenia Antzokian eta Antzoki Zaharrean aukeztuko dituzte lau ikuskariok. 

Ekainaren 3tik aurrera, San Telmo Museoko Laborategiak erakusketa bat aurkeztuko du, Donostiako Udalak Cristina Iglesias artistari eskatutako Hondalea eskultura publiko berriaren sortze-prozesua ezagutzera emateko. Erakusketa hau irailaren 26ra arte egongo da ikusgai, Laborategian, doako sarrerarekin.