Web mapa
Bazkideen menua

Donostia Kultura txartela

Abantailak ikusi

Hizkuntzak

San Telmo Museoak Women are Beautiful erakusketa aurkezten du, Garry Winogrand (New York, 1928-1984) argazkilari amerikarraren 85 irudiekin, Lola Garridoren bildumakoak. Erakusketa 2022ko azaroaren 12tik 2023ko urtarrilaren 29ra egongo da ikusgai.

© Oskar Moreno

Garry Winogrand XX. mendeko Ipar Amerikako argazkigintzaren berritzaile handienetako bat da. Argazkigintzak errealitatea zuzenean hartzen zuen garaian, Winogrand amerikar estilo berriaren ordezkarietako bat izan zen, eta bide berriak ireki zituen Street Photography izenekoan. Bere lanak, Robert Franken lanaren eragin handia izan zuenak, inork ez bezala azaltzen jakin zuen 60ko eta 70eko hamarkadetako eraldaketa sozial femeninoa, emakumearen emantzipazioa eta gizartean zuen rol berria islatzen duten emakumeen erretratuekin. Hamarkada oso batean zehar, Winograndek argazkigintzaren historiarako aldaketa indartsu hau hilezkor bihurtzen duen dokumentu bakarra eraiki zuen. 1960 eta 1975 artean egindako Women are Beautiful seriea monografia gisa argitaratu zen 1975ean. John Szarkowskik, garai hartan New Yorkeko Arte Modernoko Museoko argazki-komisarioa zenak, Winograndek egindako ehunka argazkien artean laurogeita bost irudi hautatu zituen monografiarako.

Lola Garrido bildumagile donostiarrak 1994an eskuratu zuen seriea enkantean, eta azken urteotan hainbat erakusketa zentrotan aurkeztu da.

Bildumagile, komisario eta kritikaria, Garridok artearen munduan garatu du bere ibilbide osoa. Filosofian lizentziatua, 1985ean Arte Ederren Zirkuluan Bideo Artearen Lehen Jaialdi Nazionala antolatu zuen, eta Madrilgo Erkidegoko kultura-aholkulari gisa, Isabel II.aren Kanaleko Erakusketa Aretoko zuzendari gisa eta Banesto Fundazioko Proiektu Berezien zuzendari gisa lan egin du. Zazpi urtez Foto Colectania Fundazioaren Zuzendari Artistikoa izan zen, eta bere aldizkaria 2004an jarri zuen abian. Aitzindaria izan zen argazkigintzako bildumagile gisa Espainian, 1.000 pieza baino gehiago bildu ditu eta bere bilduma hainbat museotan erakutsi da. Kritikari gisa parte hartzen du hainbat komunikabidetan eta artearen merkatuko artean eta ekonomian espezializatutako argitalpenetan. Gainera, bildumagintzari, arteari eta merkatuari buruzko hitzaldiak eman ditu Frantzian, Italian eta Espainian, eta hainbat sari nazionaletan parte hartu du epaimahaikide gisa.