Friki Harrotasunaren hilabetea Egiako Liburutegian

Friki Harrotasunaren jaialdia maiatzaren 10ean hasiko da, baina jarduera paraleloak ere izango dira hilabete osoan zehar. Jarduera horien bidez, Egia auzoko neska-mutilek liburutegia apainduko dute "frikien kanonek agintzen duten bezala"; edota ordenagailu-joko txikien lehiaketetan parte hartuko dute. Hona hemen Egiako Liburutegian prestatutako programa (ekintza guztiak 18:00etan izango dira):

• Maiatzak 10: Mahai Jokoen Erauntsia. Frikiegiako leloetako bat hauxe da: "friki bat bera ere ez bere mahai jokorik gabe", beraz, taula eta dadoaren festa izango da.

• Maiatzak 24: It's only rol, but I like it. Rol jokoak gustoko dituztenentzat, partida batzuk antolatu dituzte auzoko gaztetxoekin, bertako beteranoenekin eta erdian daudenekin. Aukeratutako gaia hau da: literatura.

• Maiatzak 29:  Kasete birbobinatze II. Mundu Txapelketa Bic Boliarekin. Beso eta eskumutur boteretsuenak azkarrenak izateagatik borrokatuko dira.

• Maiatzak 31: Urteroko hitzorduan hutsik ez egiteko, aurten ere Friki Zozketa Handia egingo da. Bertan, parte hartzaileek liburutegiko opari esklusibo bat irabaz dezakete. Hainbeste urteren ondoren, denetarik oparitu dute: katiluak, kamisetak, sukaldeko mantalak, eskuoihalak... 2024an, berriz, opari berezia: Hondartzako baloia.
  Zozketarako txartelak hainbat bidetatik lor daitezke:
  a) Liburutegiko dokumentu frikiak maileguan hartuta, hala nola telebista-serieak, komikiak, fantasiazko eta zientzia fikziozko liburuak, film fantastikoak eta horrelako lanak.
  b) Friki-Trivialean parte hartuz
  c) Poster-Frikietako pertsonaiak asmatuz
  Dagokion txartelaz gain, parte hartze bakoitzeko txapa bat emango da, friki diseinu batekin apaindua.