Hizkuntzak
San Telmo Museoko aldi baterako erakusketak ikusteko azken asteak, jarduera eskaintza anitzarekin
Indésirables. Bonbardaketatik esparrura. Erbesteratzearen ibilbideak; Women are Beautiful. Garry Winogrand; eta Kimia Kamvariren Alef erakusketak azken asteetan sartzen dira. Lehenengo biak urtarrilaren 29ra bitarte ikusteko aukera dago eta azkena, aldiz, otsailaren 5a arte.
2023ko programazioko erakusketa berriak zabaldu baino lehen, oraindik aukera dago San Telmo Museoan ikusgai dauden aldi baterako hiru erakusketetaz gozatzeko. Erakusketa aretoetan dauden Indésirables. Bonbardaketatik esparrura. Erbesteratzearen ibilbideak, Women are Beautiful. Garry Winogrand, urtarrilaren 29a arte izango dira zabalik eta Laborategian kokatutako Alef, Kimia Kamvari artistarena, otsailaren 5a arte.
Indésirablesen kasuan, urtarrilaren 28ra arte eskainiko dira programatutako bisitak. Asteartero eta larunbatero erakusketara bisita gidatuetan parte hartuta gerturatzeko aukera dago. Webgunearen bitartez aurretiaz izena eman behar da eta sarreraren prezioaren barne daude bisita hauek.
Horretaz gain, erakusketa honekin lotutako jarduera ezberdinak ere burutuko dira museoan urtarrilean zehar, guztiak doako sarrerarekin.
Lehenengoa bihar bertan izango da, urtarrilak 13. Miquel Bassols psikoanalistak hitzaldia eskainiko du, 19:00etan hasita, Exilio y retorno de la verdad desterrada. Jarduera hau streaming bitartez ere jarraitu ahal izango da museoaren YouTubeko kanalean.
Hilaren 26an burutuko dira beste bi proposamen.10:15etan Josu Txuekak Gurs. Askatasuna txarrantxen artean hitzaldia eskainiko du eta erakusketa bisita gidatua egingo du.
19:00etan Amets Arzallus izango da hitzaldia eskainiko duena ekitaldi aretoan, Miñan, idatzi gabeko gogoetan tituluarekin. Miñan (Susa argitaletxea, 2019) liburuaren nondik norakoak aski ezagunak dira. Oraingo honetan, Amets Arzallus idazle eta bertsolariak, bere esperientziak abiapuntu hartu eta liburuan ageri ez diren gogoetak partekatuko ditu. Jarduera hau streaming bitartez ere zuzenean jarraitu ahal izango da museoaren YouTubeko kanalean.
Azkenik, urtarrilaren 28an, larunbata, museoan ohikoa den argazki-liburuen programazioko saioa erakusketarekin lotuta egongo da, Daniel Blaufuks egileak Terezín liburua aurkeztuko duelako. Terezín Blaufuksen liburu pertsonala da, Theresienstadt edo Terezingo kontzentrazio-esparru naziaren historiari buruzkoa. Ekitaldia 12:00etan hasiko da eta euskarazko eta gaztelaniazko itzulpena izango du.
