Xabi San Sebastian Betazalak

Xabi San Sebastian (gitarra eta ahotsa), Karlos Arancegui (bateria), Nando Lutxo Neira (baxua eta kontrabaxua), Satxa Soriazu (teklatua eta eskusoinua), Gari Otamendi (biolina eta biola).

Xabi San Sebastian abeslariak Betazalak bere azken lana aurkeztuko du. Tantaz tanta destilatutako hamar kantu berri dakarzkigu, hamar begirada. Folk kantautoreen ildoa jarraituz, soinu akustiko finez jantzitako hitz poetiko-politikoak landu dituzte Harkaitz Cano, Beñat Gaztelumendi, Iñigo Astiz eta Xabik berak.

Urrian 20 urte beteko dira bere lehen diskoa (Orai) Donostian aurkeztu zuenetik eta hau ospatzeko urte hauetan guztietan bidean topatutako hainbat lagun abeslari eta musikari hurbilduko dira berarekin batera kantuak jo edota abestera. Han izango dira Niko Etxart, Joseba Tapia, Oreka TX, Ixi Jauregi (Bitartean, Biotx, Juan Mari Beltran) eta Juanjo Otxandorena (Izotz, Alboka) oholtza partekatzen.